Sumu 54 - Tonga Bible 1986

Kurombe kutaskika ku ŵamawongo

Ku wakumba mura; pa vyamalisinga. Sumu yaku Davidi; ŵachiza ŵaZifi ndi kunene Sauli, “Asi Davidi wabisama kwidu?”

¹ A Chiuta, nditaskeni, mu zina linu, ndipo nderuzgeni mu nthazi yinu.

² Vwani kuromba kwangu, A Chiuta; tegherezgani ku mazu gha mlomo wangu.

³ Pakuti ŵanthu ŵa mtonyoro ŵandiyukiya, ŵanthu ŵakari ukongwa ŵapenja umoyo wangu; kuti ŵaŵika Chiuta paurongo pawo cha.

⁴ Ehe, Chiuta ndi movya wangu; Ambuya ndi muvikiriya wa umoyo wangu.

⁵ Iwo akawezgiyanga uheni pa ŵarwani ŵangu; mu ukongorekwa winu muŵadumuwe.

⁶ Ndi mpasku wa wanangwa ndiperekenge sembe kwaku imwe; ndiwongenge zina linu, Ambuya, chifukwa ndamampha.

⁷ Pakuti mwandipozomoska ku suzgu yose, ndipo jiso langu lalereska mwa upundi pa ŵarwani ŵangu.