Sumu 51 - Tonga Bible 1986

Mulakwi wakupe waŵeyere chireke

Ku wakumba mura. Sumu yaku Davidi: wachiza kwake Natani mchimi, penipo wangusere kwaku Betesheba

¹ Ndichitiyeni wezi A Chiuta, kwakuyana ndi chifundu chinu; uli mbunandi wa vya lisungu vinu sisitani mamphuru ghangu.

² Mundisuke ku kubende kwangu, ndipo mundiphoto ku kwananga kwangu.

³ Chifukwa mamphuru ghangu ine ndituziŵa ndipo uheni wangu we paurongo pangu nyengo yose.

⁴ Imwe, imwe pe, ndanangiya, ndipo cho nchiheni mu maso ghinu ndachita, viyo, murunjika pa kunderuzga ndi ambura kalema mu cheruzgu chinu.

⁵ Ehe, mu kubende ndingulengeka, ndipo mu kwananga wangundizuwukiya ama.

⁶ Ehe, imwe mukhumba uneneska wa mukati mu mtima; chifukwa ichi mundisambizge zeru mukati mwangu.

⁷ Ndiphotoni ndi hisope, ndipo nditowenge, ndisukeni, ndipo nditowenge kwakuruska nyankhuŵinda.

⁸ Ndizazeni chimwemwe ndi kukondwere; vyangare viwanga vyo mwaphwanya.

⁹ Bisani chisku chinu ku kunanga kwangu, ndipo sisitani kubende kwangu kose.

¹⁰ Mtima wakutowa mundilenge, A Chiuta, ŵikani mukati mwangu mzimu ufya ndi wakunyoroka.

¹¹ Rekani kunditaya kutali; kundituzga pa maso pinu, ndipo mureke kutuzgako kwangu mzimu winu wakupaturika.

¹² Werezgiyani kwangu kulankha kwautaski winu, ndi mzimu wa wanangwa ndichirikiriyeni.

¹³ Po ndipo ndisambizgenge ŵakupuruka nthowa zinu ndipo ŵakunanga ŵaweriyenge kwaku imwe.

¹⁴ Ndipozomoskeni ku mlandu wa ndopa, A Chiuta, imwe ndimwe Chiuta mpozomoski wangu, ndipo lilime langu likamburiyenge imwe chifukwa mwanditaska.

¹⁵ Ambuya, jurani milomo yangu, ndipo mlomo wangu utaulenge rumbu linu.

¹⁶ Chifukwa kuti mukondwa ndi sembe cha; asani ndingupereka mpasku wakocha imwe kuti mwatinge mukondwenge cha.

¹⁷ Sembe yakurondeka ndi Chiuta ndi mzimu wakusweka; mtima wakusweka ndi wakupe, A Chiuta, imwe kuti muyeyenge cha.

¹⁸ Chitiyani umampha Zioni mu kukondwa kwaku mwaŵeni; zengani so malinga ghaku Yerusalemu,

¹⁹ penipo ndipo mukakondwanga mu sembe za urunji. Mu mipasku yakocha ndi mipasku yizirima yakocha po ndipo zinkhuzi zikaperekekanga pa jochero linu.