Sumu 50 - Tonga Bible 1986

Chiuta ndi mweruzgi wa ŵarunji ndi ŵaheni

Sumu yaku Asafi

¹ Wanthazi zose, Chiuta Ambuya, warongoro wadana charu chapasi kutuwa ku utuli wa lumwi mpaka ku kuselere kwake.

² Kutuwa mu Zioni, utozi wakufikapo, Chiuta waŵala.

³ Chiuta widu watuza, kuti waja chisisi cha, moto wakunyekeska we paurongo pake, wazingirizgika ndi lirondo la nthazi.

⁴ Wadana ku malo gha kuchanya ndi ku charu chapasi, mwakuti weruzgi ŵanthu ŵake:

⁵ “Ndiunjikiyeni ŵamagomekezgeka ŵangu, wo ŵakupangana nane phanganu mu sembe!”

⁶ Machanya ghataula urunji wake, pakuti Chiuta mweneko ndimweruzgi!

⁷ “Avwani, mwa ŵanthu ŵangu, ndipo ndikambenge, wa Yisraele, ndipanikizgiyenge paku iwe. Ine ndine Chiuta, Chiuta wako.

⁸ Kuti nditukususka chifukwa cha sembe zako cha; mipasku yako yakocha ye paurongo pangu rutaruta.

⁹ Kuti ndirondenge nkhuzi kutuwa mu nyumba yako cha, nanga nchiphongo mu makhora ghako.

¹⁰ Pakuti nyama yose ya mu dondo njangu, ng'ombe zamu mapiri chikwi.

¹¹ Ndiziŵa viyuni vyose vya mude, ndipo vyose vyakwenda mu dondo vyangu.

¹² “Asani ndenga ndi nja, kuti ndatinge ndikuneniyengecha; chifukwa charu ndi uzari wake vyose vyangu.

¹³ Kumbi nditurgha nyama ya zinkhuzi, pamwenga kumwa ndopa za zimbuzi?

¹⁴ Kombole kwaku Chiuta chisopo cha kuwonga, ndipo pereka marapu ghako ku wapachanya limu;

¹⁵ undidane mu zuŵa la suzgu; ndikupozomoskenge, ndipo undikankhuskenge.”

¹⁶ Kweni ku ŵaheni Chiuta watiti: “Kumbi iwe wendi mazaza uli kukonkhoma vyakukamba vyangu, ndi kutole phanganu langu mu milomo yako?

¹⁷ Pakuti iwe utinkha kuchenjezgeka, mazu ghangu utighapong'a kuvuli kwako.

¹⁸ Po uwona munkhungu, uzomerezgana nayo; ndipo usangana ndi ŵareŵi.

¹⁹ “Upereka mlomo wako ku uheni, ndi lilime lako latata vyakupusika.

²⁰ Uja pasi pa kurongoro vya kunena mbali wako; usulizga mwana wa anyoko.

²¹ Ivi ndivyo wachita kweni ine ndingujachete; iwe waghanaghananga kuti ndiyana nge ndiwe. Kweni sono nditukuchenya, ndiŵika cheruzgu pa maso pako.

²² “Sono ziŵani ichi, mwa ŵakuruwa Chiuta, vinu ndingakuparuwani, ndi kungaŵavi wakutaska!

²³ Yo wapinga chisopo cha kuwonga nge ndi sembe yake, wakankhuska ine; kwaku yo wanozga nthowa yake, ndirongonge chipozomosko chaku Chiuta!”