Sumu 5 - Tonga Bible 1986

Rombu la kutaskika ku ŵaheni

Ku wakumba nura: pa virumbu vyakuphutiyamo. Sumu yaku Davidi

¹ Tegherezgani ku mazu ghangu, A Chiuta; avwani ku kutamantha kwangu.

² Vwiskani mazu ghakudanirizga kwangu, mwa karonga wangu ndi Chiuta wangu, pakuti ndiŵeyere kwaku imwe.

³ Ambuya, ndi mlenji muvwenge mazu ghangu; ndi mlenji ndinozge sembe yangu kwaku imwe, ndi kukhazga.

⁴ Pakuti imwe kuti mwe Chiuta wakukondwa mu uheni cha; uheni kuti wanguja pamoza ndi imwe cha.

⁵ Wakujirumba kuti wangama paurongo pa maso ghinu cha; mutinkha wose wakuchita utimbanizi.

⁶ Imwe mumarenge wo mbakukamba mautesi; Ambuya apata ŵanthu ŵakudiska ndopa ndi ŵakupusika.

⁷ Kweni ine, mu unandi wa vya chifundu vinundiserenge mu nyumba yinu, ndisopenge kurazga ku nyumba yinu yakupaturika mu kumopani imwe.

⁸ Ambuya, mundirongozge, mu urunji winu chifukwa cha ŵarwini ŵangu; munyoroske nthowa yinu paurongo pangu.

⁹ Pakuti mulivi uneneska mu mlomo wawo; mtima wawo ndi phasulu, khosi lawo ndi muunda wa mwazi, ndi lilime lawo ŵakamba kwakunyenga.

¹⁰ Muŵapingizge kunanga kwawo, A Chiuta muŵawiske mu fundu za ŵeneko; chifukwa cha unandi wa mphurupuru zawo muŵataye kubwalo, pakuti ŵamugarukiyani imwe.

¹¹ Kweni ŵakondwe wose ŵakudingang'a mwaku imwe, ŵambiyenge chimwemwe muyaya; muŵavikiriye, alinga kuti wo ŵatanja zina linu wakondwenge mwaku imwe.

¹² Chifukwa imwe mutumbika murunji; A Chiuta mutimuzingirizga ndi ulemu nge ndi nguru.