Sumu 44 - Tonga Bible 1986

Utaski wakale, ndi ufinyi wa sono

Ku wakumba mura. Sumu ya ŵana ŵaku Kora

¹ Tikuvwa ndi makutu ghidu, A Chiuta, auskefwe akutikonkhome, nchitu yo munguchita mu mazuŵa ghawo, mu mazuŵa ghamwaka;

² imwe ndi janja linu mungutuzga mitundu ya ŵanthu, kweni iwo munguŵapanda; mungusuzga makhamu, kweni iwo munguŵajarika mu wanangwa;

³ chifukwa kuti ŵangupoka charu ndi lipanga lawo cha, ndipo kuti ndi mkono wo unguŵapaska kupunda cha; kweni ndi janja linu lakurghiya, ndi mkono winu, ndi kuŵala kwa chisku chinu; chifukwa mungukondwere mwaku iwo.

⁴ Ndimwe karonga wangu ndi Chiuta wangu, yo walanguliya maupundi kwaku Yakobe.

⁵ Mwaku imwe tifwenkhuliyenge ŵakupindikana nafwe, mu zina linu tiphwatiyenge ŵakutiyukiya.

⁶ Chifukwa kuti ndigomekezga mu uta wangu cha nanga ndi lipanga langu kuti liziŵa kunditaska cha.

⁷ Kweni imwe mwatitaska ku ŵakupindikana ŵidu, ndipo ŵakutitinkha mwaŵalengeska.

⁸ Mwaku Chiuta ndimo titijikuzgiya rutaruta, ndipo tiwongenge zina linu muyaya.

⁹ Kweni sono mwatitaya ndi kutikhozga soni, ndipo kuti mutuwa pamoza ndi nkhondo zidu cha.

¹⁰ Mutitiwezge vuli kutuwako ku ŵakupindikana ŵidu: ndipo ŵarwani ŵidu ŵaskowa.

¹¹ Mwatipereka nge ndi mberere zakubayika, ndipo mwatimbininiskiya mukati mu mitundu,

¹² mwaguliska ŵanthu ŵinu kwambura usambasi, ndipo kuti mwaŵaguliska ndi mtengo wapatali cha.

¹³ Mwatisanduska chitozeru ku ŵakuzengezgana nafwe, kawerere ndi kayeyedu ku ŵakutizunguliya.

¹⁴ Mwatisanduska kuŵa nthanthi mu mitundu, ŵakusekeka mukati mu makhamu.

¹⁵ Zuwa lose kulengeskeka kwangu kwe paurongo pangu, ndipo soni zakuka chisku changu,

¹⁶ chifukwa cha mazu gha ŵakutombozga ndi ŵakuwera pa maso gha murwani ndi wakutaya thayu.

¹⁷ Chose ichi chatiziya, kweni kuti taruwa imwe cha, chingana nkhuchita kwautesi mu phanganu linu.

¹⁸ Mtima widu kuti wawere kuvuli cha, chingana ndi menderu ghidu kuti ghapatukako ku nthowa yinu cha,

¹⁹ nanga imwe mwatiphwanya mu malo gha ŵakambwe, ndipo ndi kutivimba ndi munkhorwe.

²⁰ Viyo asani taruwa zina laku Chiuta widu, pamwenga kutamburuliya manja ghidu ku chiuta mlendo,

²¹ asi mphanyi Chiuta wachibowozga ichi? Pakuti waziŵa vyakubisika vya mtima.

²² Awa, chifukwa chinu tibayika zuŵa lose, tapimikiya nge ndi mberere zakubayika.

²³ Yukani, Ambuya! Kumbi mugoniyanji? Sokani! Rekani kutijowo muyaya!

²⁴ Mubisiyanji chisku chinu? Mwaruwiyanji suzgu yidu ndi kuzitiskika kwidu?

²⁵ Pakuti mzimu widu ukotamiya pasi pa fuvu; liŵavu lidu limiziriya pa dongo.

²⁶ Sokani, Zaninga muzichitovya! Tipozomoskeni chifukwa cha chifundu chinu!