Sumu 41 - Tonga Bible 1986

Wakumba watama, ndipo wadagha

Ku wakumba mura. Sumu yaku Davidi

¹ Ngwakutumbikika yo waghanaghaniya wakutomboroka! Ambuya atimpozomoska mu zuŵa la suzgu;

² Ambuya atimuvikiriya ndi kumusunga wamoyo; wadanika wakutumbikika mu charu; imwe kuti mutimupereka ku khumbo la ŵarwani ŵake cha.

³ Ambuya atimchirikizga pa chita cha kutama kwake, mukutama kwake imwe muchizga maunthomboro ghake ghose.

⁴ Ine, ndinguti, “Ambuya ndichitiyeni wezi: ndichizgeni, pakuti ndanangiya imwe!”

⁵ Ŵarwani ŵangu ŵakamba uheni paku ine: ŵatiti, “Wafwenge zuŵanji, ndipo limarengi zuŵanji zina lake?”

⁶ Ndipo asani munthu watuza kundiwona, wakamba utesi, penipo mu mtima wake watijiwunjikiya vya phasulu; ndipo wachituliya kubwalo, wativikamba pakwero.

⁷ Ŵatokotezgiyana paku ine wose ŵakunditikha; ŵatindighanaghaniya vya kundipweteka.

⁸ Ŵatiti, “Chinthu chakufwa chamuko; ndipo po wagona kuti wakayukangapo so cha.”

⁹ Nanga ndi mwanasi wangu wapa mtima mwaku mweniyo ndingugomekezga, yo wangurgha kurgha kwangu, nayu so wandisoske chitende chake.

¹⁰ Kweni imwe, Ambuya, ndichitiyeni wezi, nditumphuskeni, alinga kuti ndiŵawerezgiyepo!

¹¹ Mwaku ichi ndiziŵa kuti mukondwere mwaku ine, pakuwona kuti murwani wangu kuti wandipunda cha.

¹² Imwe mwandikoreze chifukwa cha urunji wangu, ndipo mwandimiska pa maso pinu muyaya.

¹³ Atumbikike Ambuya, Chiuta waku Yisraele, kutuwa ku muyaya mpaka ku muyaya! Ameni ndi Ameni.