Sumu 39 - Tonga Bible 1986

Umoyo ndi mvuchi pe

Ku wakumba mura, kwaku Yedutuni. Sumu yaku Davidi

¹ Ndinguti, “Ndikaphwerenga nthowa zangu, mwakuti ndireke kwananga ndi lilime langu; ndimangenge mlomo wangu ndi chakumangiya, penipo pose ŵaheni ŵe pamaso pangu.”

² Ndinguŵa mbuwu ndinguchetama, ndingujiko mtima kwaŵaka, suzgu yangu yingukuwa ukongwa.

³ Mtima wangu ungufunda mukati mwangu, ndichirunguruka, moto ungukole; sono penepo ndingukamba ndi lilime langu:

⁴ “Ambuya, ndiziŵiskeni umari wangu, ndi unandi wa mazuŵa ghangu mo ghaliri; ndiziŵiskeni chigoti cha umoyo wangu.

⁵ Awonani, mwaŵika mazuŵa ghangu ghamanavi nge mbusani wa chikufi, ndipo nyengo ya umoyo wangu yenge nkhanthu cha mu maso ghinu! Nadidi munthu yose watuma ulaka nge nkhamvuchi kawaka!

⁶ Nadidi munthu watenda nge nchiduzi! Kwakuneneska wakweŵeka kwawaka; munthu waunjika, kweni kuti waziŵa cha yo wakaronganga!

⁷ “Na sono, Ambuya ndilindanji? Chigomezgu changu che mwaku imwe.

⁸ Ndipozomoskeni ku kupuruka kwangu kose. Rekani kundisanduska chitozeru cha wakupusa!

⁹ Nde mbuwu, kuti ndibanuwa mlomo wangu cha; chifukwa imwe ndimwe mukuchichita.

¹⁰ Mungandikwe chuwanga cha; ndamarizgika ndi kupuma kwa janja linu.

¹¹ Po mulanga munthu ndi kumuchenya chifukwa cha uheni, muparghang'a nge ndi fufuzi cho kwake nchakwanjiwa; kwakuneneska munthu yose nkhamvuchi kawaka!

¹² “Ambuya, vyani rombu langu, ndipo tegherezgani ku nkhuta yangu; pa masozi ghangu rekani kuja chisisi! Pakuti nde mlendo winu wakurutiliya, mwenda-nthowa, nge mba da wose.

¹³ Ndirekeni, mwakuti ndiziŵe kukondwere, ndenga ndi ndatuwepo pano, ndi kureka kuŵapo so.”