Sumu 38 - Tonga Bible 1986

Rombu la wakupe mu suzgu yake

Sumu yaku Davidi. Kukumbuska

¹ Ambuya mungandichenyanga muukari winu! Nanga nkhundilanga mu kukwiya kwinu!

² Pakuti mivwe yinu yandirasa, ndipo janja linu landinyekezga.

³ Mulivi umusuma mu liŵavu langu chifukwa cha kandundu kinu; mu viwanga vyangu mulivi umoyo chifukwa cha uheni wangu.

⁴ Pakuti kubende kwangu kwabizga mutu wangu; ndavuka navyo nge ndi katundu muzitu.

⁵ Mabala ghangu ghanunkha ndi kuvunda chifukwa cha uzereza wangu.

⁶ Ndakotama ukongwa ndasindama; zuŵa lose nditenda wakutenje.

⁷ Mu chiunu mwangu mutufya ukongwa, ndipo mu nyama yangu mulivi umusuma.

⁸ Ndarombotoka ukongwa ndi kuphwanyika; nditamantha chifukwa cha chiwawa cha mtima wangu.

⁹ Ambuya, linweka langu lose liziŵikwa ndi imwe, kutamantha kwangu kwaku imwe kuti kwabisika cha,

¹⁰ mtima wangu umwantha, nthazi zangu zalopwa, ndipo kungweruka kwa maso ghangu nako so kwatuwamo mwangu.

¹¹ Ŵabali ŵangu ndi ŵanyangu ŵatuma kutali chifukwa cha vironda vyangu, ndipo ŵanasi ŵangu ŵatuma kutali.

¹² Wo ŵapenja umoyo wangu ŵatuthya viŵana vyawo, wo ŵakhumba kundipweteka ŵarongoro matuntha ghaheni, ndipo ŵaghanaghana vya chiŵembu zuŵa lose.

¹³ Kweni ine nge ndi mgota, kuti ndituvwa cha, nge ndi munthu mbuwu yo kuti wajura mlomo wake cha.

¹⁴ Inya, ndi nge ndi munthu wambura kuvwa, yo mu mlomo wake mulivi vyakususka.

¹⁵ Kweni kwaku imwe, Ambuya, ndikundilindizga; Ambuya, Chiuta wangu, imwe ndimwe mukamukanga.

¹⁶ Ndiromba kuti, “Chondi ŵareke kukondwere paku ine, wo ŵatijikuzga asani rundi langu lateremuka.”

¹⁷ Pakuti ndi pafupo limu kuwa, ndipo urwirwi wangu we nane nyengo yose.

¹⁸ Ndisumuwa kulakwa kwangu, nde wa chitima ndi uheni wangu.

¹⁹ Wo mbarwani ŵangu kwambura kafukwa mbanthazi, ndipo mbanandi wo ŵatinditinkha kwawaka.

²⁰ Ŵakundiwezge uheni pa umampha mbarwani ŵangu, chifukwa ine ndirondo cho nchamampha.

²¹ Ambuya mwe, rekani kundisiya! A Chiuta wangu, mungaŵanga kutali ndi ine!

²² Tinthimikani kundovya, Ambuya, mtaski wangu!