Sumu 35 - Tonga Bible 1986Kurombe kutaskika ku amawongo Sumu yaku Davidi 1 Suskanani nawo, Ambuya wo ŵasuskana nane; rwanani nawo wo ŵarwana nane! 2 Koni nguru ndi chivekeru, ndiposokani kundovya! 3 Soroni mkondo, ndipo jarani nthowa ya wakundindondoloska! Kambani, ku mzimu wangu, “Ndine wakukupozomoska!” 4 Ŵachiti soni ndi ŵalengeskeke ŵakupenja umoyo wangu! Wawezgeke kuvuli ndipo ŵatimbanizgike ŵakurungurukiya uheni paku ine! 5 Ŵaŵe nge ndi mwere paurongo pa mphepo, mungelo wa Ambuya waŵadikiske! 6 Nthowa yawo yiŵe mdima ndi yakuteremuka, mungelo wa Ambuya waŵandondoloske! 7 Chifukwa ŵangundithya chirepa chawo kwambura kafukwa; ŵangukumbiya mbuna umoyo wangu kwambura kafukwa. 8 Phasulu liŵaziye kwa mabuchibuchi! Ndipo chirepa cho ŵakuthya ŵawiremo ŵeneko; zomerani kuti ŵawemo ndi kuparghanika! 9 Po ndipo mzimu wangu wangarenge mu Ambuya, kukondwere mu chipozomosko chawo. 10 Viwanga vyangu vyose vikatinge, “A! Ambuya, njani wakuyana ndi imwe, ndimwe mutaska wambura nthazi kwaku yo ngwanthazi zakuruska iyo, wakutomboroka ndi msauchi kwaku mweniyo watimuskoŵa?” 11 Ŵakaboni ŵakari ŵayuka; ŵatindifumba vyo ine kuti nditiviziŵa cha. 12 Watindiwezge uheni pa umampha; mzimu wanguuyuzgika. 13 Kweni ine, po iwo ŵangutama, ndinguvwara chigudulu, ndingujisuzga mzimu pa kufunga kurgha; ndinguromba pakusindamiya mutu wangu pa chifuŵa. 14 Ulaka nge ndingutenjere mbali wangu pamwenga mwana munyangu; ndingwenda nge njumoza wakuliriya anyina, ndawakukotama pasi uku nditenje. 15 Kweni pakuguŵa kwangu ŵanguwungana kundiseka, ŵanguwungana pamoza kumikana nane; ŵakupunduka ŵeniwo kuti ndinguŵaziŵa cha ŵangundikambiya utesi kwambura kurekezga; 16 kwambura uwopa Chiuta ŵangundiwera ukongwa, ŵangundikukutiya minyu ghawo. 17 Mpaka zuŵanji, Ambuya mulereskengeko waka? Nditaskeni ku nkhaza zawo, umoyo wangu ku zinkharamu! 18 Penipo ndipo ndiwongenge imwe mu unganu ukuru; mu khamu lanthazi ndirumbenge imwe. 19 Kuti ŵakondwe paku ine cha, wo mbamawongo ŵangu kwambura kafukwa, ŵareke kuphaniya jiso ŵakunditinkha kwawaka. 20 Pakuti kuti ŵakamba chimangu cha, kweni ŵapangana gha chiŵembu paku wo mbakuja cheti mu charu, ŵakhozga mazu gha utimbanizi. 21 Ŵayasama milomo yawo kumikana nane; ŵatiti, “Aha, Aha! Maso ghidu ghachiwona!” 22 Imwe mwachiwona, Ambuya; rekani kuja chisisi! Ambuya, mungaŵanga kutali ndi ine! 23 Mujiyuskiye muchanya, ndipo yukani pa urunji wangu, pa mlandu wangu, mwa Chiuta wangu ndi Mbuyangu! 24 Nderuzgeni, Ambuya, Chiuta wangu, kwakulingana ndi urunji winu; ndipo ŵareke kundiwera! 25 Ŵareke kunena mu mtima wawo, “Aha, apa ndipo takhumbiyanga!” Ŵareke kunena, “Tamumeza.” 26 Ŵachiti soni ndipo wose pamoza ŵatimbanizgike, wo ŵakondwa pa soka langu! Ŵavware soni ndi chilengesku wo ŵatijikuzga pakumikana nane! 27 Ŵakambure ndi chimwemwe ndipo ŵakondwe wo ŵanweke urunji paku ine, nyengo yose watinge, “Mbakuru Ambuya, wo akankhaŵiya muchimangu cha mteŵeti wawo!” 28 Viyo nditaulenge vya urunji winu ndi ndirumbenge imwe zuŵa lose. |
Bible Society of Malawi
Bible Society of Malawi