Sumu 32 - Tonga Bible 1986

Mwaŵi wa chireke ndi chigomekezgu mwaku Chiuta

Sumu yaku Davidi

¹ Ngwakutumbikika yo kwagowokereka kwananga kwake, mweniyo kulakwa kwake kwawundika.

² Wakutumbikika ndi munthu yo Ambuya kuti atimpimiya kubende cha, yo mu mzimu wake mulivi urghargha.

³ Ine po ndengavi kuzomera kwananga kwangu liŵavu langu lenga lakonda; chifukwa cha kutamantha kwangu kwa zuŵa lose.

⁴ Pakuti msana ndi usiku janja linu linguŵa lizitu paku ine; nthazi yangu yingumira nge nkhufunda kwa chihanya.

⁵ Kwananga kwangu ndingumuziŵiskani, ndipo kubende kwangu kuti ndingubisa cha; ndinguti, “Ndizomerenge mamphuru ghangu ku Ambuya”; ndipo imwe mungugowoke kwananga kwa uheni wangu.

⁶ Chifukwa ichi we yose yo ngwauchiuta wapereke rombu kwaku imwe; pa nyengo ya suzgu, mukusapatiya kwa maji ghanandi, kuti ghamukwaskenge cha.

⁷ Ndimwe chakubisamamo changu, mutindivikiriya ku suzgu; mutindizingirizga ndi chipozomosko.

⁸ Ndikurunguchizgenge ndi kukusambizga nthowa yo utenere kwendamo; ndikupangenge fundu, jisu langu liŵengepaku iwe.

⁹ Ungaŵanga nge ndi kavalo pamwenga nyuru, yo yirivi chinjeru, yitenere kuŵa ndi chisulo ndi chikhoŵe ku mlomo, kwambura ivi kuti yingasungika pamoza nawe cha.

¹⁰ Nganandi maurwirwi ku muheni; kweni chanju chikuru chitimuzingirizga yo ngwakugomekezga mu Ambuya.

¹¹ Kondwani mu Ambuya, ndipo sekeriyani, mwaŵarunji mwe, kamburani ndi chimwemwe, mose mwa ŵakunyoroka mtima!