Sumu 31 - Tonga Bible 1986

Rombu la kukwininika ndi la marumbu

Ku wakumba mura. Sumu yaku Davidi

¹ Mwaku imwe Ambuya ndidingang'a; ndireke kurengeskeka muyaya; mu urunji winu ndipozomoskeni!

² Sendekiyani gutu linu kwaku ine, nditaskeni kwakutinthimika! Mundiŵiye jarawi la utaski wangu, linga lakukho kunditaska!

³ Inya, imwe ndimwe jarawi langu ndi linga langu, chifukwa cha zina linu pe mundirongozge ndi mundidanjiriye.

⁴ Mundisowo mu chirepa cho chabisika, chifukwa ndimwe chakudingang'omo changu.

⁵ Mu janja linu ndipereka mzimu wangu; mwandiwombo, Ambuya, Chiuta wamagomekezgeka.

⁶ Imwe mutinkha wo mbakuphwere ŵangoza ŵa waka; kweni ine ndigomekezga mu Ambuya.

⁷ Ndangarenge ndi ndikondwenge chifukwa cha chanju chinu chikuru, pakuti imwe mwawona suzgu yangu, mwapanikizga vya ŵarwani ŵangu;

⁸ ndipo kuti mwandipereka ku janja la ŵakupindikana nane cha; marundi ghangu mwaghamiska mu malo ghasani.

⁹ Mundichitiye wezi, Ambuya, pakuti nde musoka; jiso langu lafinyirizgika ndi chitima, mzimu wangu ndi liŵavu langu naluso viyo.

¹⁰ Pakuti umoyo wangu umara ndi chitima, virimika vyangu viruta mukutamantha; nthazi yangu yiropwa chifukwa cha suzgu yangu, viwanga vyangu vyaguluruka.

¹¹ Ndaŵa chakuwereka ku ŵarwani ŵangu wose, chitozeru ku ŵanasi ŵangu, chinthu cha kofya ku ŵakuziŵiriyana nane; wo ŵatindiwona munthowa ŵatindithaŵa.

¹² Ndaruwika mu mtima nge ngwakufwa, ndazgoka nge nchiyaŵi chakusweka.

¹³ Inya, ndituvwa muhihitu wa ŵanandi mantha ghe kose kose! Mo ŵaungirana pamoza upu paku ine, ndi kupangana chiŵembu kundibaya.

¹⁴ Kweni ine ndigomezga mwaku imwe, Ambuya, ndititi, “Ndimwe Chiuta wangu.”

¹⁵ Nyengo zangu zemu janja linu; ndipozomoskeni mu janja la ŵarwani ŵangu ndi ŵakundiŵemba!

¹⁶ Chisku chinu chiŵaliye pa mteŵeti winu; nditaskeni mu chanju chinu chikuru!

¹⁷ Ambuya, ndireke kulengeskeka, pakuti ndidana kwaku imwe; ŵaheni ŵalengeskeke, ŵarutenge chisisi ku muunda,

¹⁸ Milomo ya utesi yichetamiskike, yo yikambiya phuzu pa ŵarunji mu kujikuzga ndi mu kuyeya.

¹⁹ A! Ngukuru mbwenu umampha winu wo mwaŵaŵikiya ŵakumopani imwe, ndi kuŵachitiya wo ŵadingang'a mwaku imwe, mu maso gha ŵana ŵa ŵanthu!

²⁰ Mwaŵabisa mu chakubisamamo cha uŵapo winu, ku viŵembu vyaŵanthu; mwaŵakoreze umamphavi kusi ku chivwinkhu chinu, ku kukweŵeskana kwa malilime.

²¹ Atumbikike Ambuya, chifukwa kwakuziziswa andirongo chanju chawo chikuru, penipo ndenga wakujaririka nge ndi mu msumba wakuzingirizgika.

²² Ine mukuchiruka kwangu ndinguti, “Ndadikiskikiya kutali kutuwako ku chisku chinu.” Kweni munguvwa kuŵeyere kwangu, po ndinguliriya chovyo kwaku imwe.

²³ Mwanjeni Chiuta, mose mwa ŵatuŵa ŵake! Ambuya asunga wakugomezgeka, kweni atimuwerezgiyapo kwakuzara yose wakuchita kwakujikuzga.

²⁴ Muŵe ŵanthazi, ndipo khwimani mtima, mose mwa ŵakulindizga Ambuya!