Sumu 28 - Tonga Bible 1986

Kurombe chovyo, ndi kuwonge kwamuka

Sumu yaku Davidi

¹ Kwaku imwe, Ambuya ndidana; jarawi langu, rekani kundiŵiya nge ndi mgota, vinu, po imwe mutakuti mwaja chete, ine ndikaŵanga nge ndiwo ŵasikiya ku zenje.

² Vwani mazu gha kuŵeyere kwangu, ndichikutiya chovyo kwaku imwe, po ndisoske manja ghangu kulazga ku malo ghinu, ghakupaturika kwakuruska.

³ Mungandiguziyanga pamoza ndi ŵaheni, pamoza ndi ŵakuchita mphurupuru ŵakukamba chimangu ndi ŵanasi ŵawo, penipo kutinkha kwe mu mitima yawo.

⁴ Ŵapaskeni kwakulingana ndi nchitu yawo, ndi kwakulingana ndi uheni wa vyakuchita vyawo; ŵapaskeni kwakuyana ndi nchitu ya manja ghawo; ŵawezgiyeni mphoto yo njakuŵenere.

⁵ Chifukwa kuti ŵaphwere nchitu za Ambuya cha, pamwenga nchitu za manja ghawo, aŵabwanguduliyenge pasi ndipo kuti aŵazengenge so cha.

⁶ Atumbikike Ambuya! Pakuti ŵavwa mazu gha kuŵeyere kwangu.

⁷ Ambuya ndi nthazi yangu ndi nguru yangu; mtima wangu ugomekezga mwaku iwo; viyo nditovyeka, ndi mtima wangu ukondwere; ndipo nditiŵawonga ndi sumu yangu.

⁸ Ambuya ndi nthazi ya ŵanthu ŵawo nchakudingang'amo cha utaksi ku wakupakika wawo.

⁹ Taskani ŵanthu ŵinu, ndi ŵatumbikeni wo mbakumwaŵeni, muŵe imwe mliska wawo, ndipo muŵanyamuwe muyaya.