Sumu 25 - Tonga Bible 1986

Kurombe utaski, uchirongozgi ndi chireke

Sumu yaku Davidi

¹ Ambuya, kwaku imwe, ndiyinuskiya mzimu wangu.

² Mwa Chiuta wangu, mwaku imwe ndagomekezga, ndireke kulengeskeka: ŵareke kutumbiya paku ine ŵarwani ŵangu.

³ Inya, wose ŵakulindizga imwe kuti ŵalengeskekenge nanga njumoza cha; ŵachita soni wo ŵachita viŵembu kwambura chifukwa.

⁴ Ndiziŵiskeni nthowa zinu, Ambuya mwe; ndisambizgeni kenderu kinu.

⁵ Mundirongozge mu uneneska winu, ndipo ndisambizgeni, pakuti imwe ndimwe Chiuta wa chipozomosko changu; kwaku imwe ndilindizga zuŵa lose.

⁶ Kumbukani, Ambuya, vya lisungu linu, ndi vya chanju chinu chikuru, chifukwa vyaŵa vyakutuliya ku mwaka.

⁷ Rekani kukumbuka vya kulakwa kwa pa uhurwa wangu ndi mamphuru ghangu; kwakulingana ndi chanju chikuru mundikumbuke, pa chifukwa cha umampha winu pe, Ambuya, mwe.

⁸ Mbamampha ndi akunyoroka Ambuya; chifukwa chenichi asambizga ŵakunanga mu nthowa.

⁹ Arongozga ŵakujiyuyuwa mwaku cho nchakurunjika, ndi kuŵasambizga ŵakusuzgika nthowa yawo.

¹⁰ Nthowa zose za Ambuya nchifundu ndi ukongorekwa, kwaku wose wo ŵasunga phanganu lawo ndi visimisimi vyawo.

¹¹ Chifukwa cha zina linu, Ambuya, gowokiyani kunanga kwangu, pakuti nkhukuru ukongwa.

¹² Njani munthu yo watopa Ambuya? Mweniyo ndiyo amusambizgenge nthowa yo watenere kusankha.

¹³ Iyo mweneko wakajanga mu kusakata, ndipo ŵana ŵake ŵakaharanga charu.

¹⁴ Ambuya ndi bwezi laku ŵeniwo ŵati ŵawopa, ndipo phanganu lawo atiŵaziŵiska.

¹⁵ Maso ghangu nyengo yose gharata ku Ambuya, chifukwa iwo asowonge rundi langu mu chirepa.

¹⁶ Ng'anamukiyani kwaku ine, mundichitiye wezi, pakuti nde ndija ndipo wakusuzgika.

¹⁷ Yuyuskani kusuzgika kwa mtima wangu, ndipo ndituzgeni mu masoka ghangu.

¹⁸ Ghanaghananipo pa kupwetekeka kwangu ndi suzgu yangu, ndigowokiyeni kulakwa kwangu kose.

¹⁹ Mbalinga ŵamawongo ŵangu ghanaghananipo, ndimo ŵatinditinkhiya ndi tinkhu la nkhaza.

²⁰ O! Vikiriyani umoyo wangu, ndipozomoskeni; ndireke kuchitika soni, chifukwa ndidingang'a mwaku imwe.

²¹ Rekani ukongorekwa ndi kunyoroka vindisungirizge, chifukwa ndilindizga imwe.

²² Womboni Yisraele, mu masuzgu ghake ghose, A Chiuta mwe.