Sumu 24 - Tonga Bible 1986

Kaŵidu kakwenere wo ŵasere mu Zioni

Sumu yaku Davidi

¹ Nchaku Chiuta charu chapasi ndi uzari wake, charu ndi wo ŵajamo;

² chifukwa iyo wakuchijarika pa zinyanja, ndi kuchimiska pa misinji.

³ Njani wakweriyenge mu phiri la Ambuya? Ndipo njani wamenge mu malo ghawo ghakupaturika?

⁴ Yo wendi manja ghakuphotoka ndi mtima wakutowa, yo kuti wayinuskiya ku utesi mzimu wake cha; ndipo kuti warapa kwakupusika cha.

⁵ Wakarondanga vitumbiku ku Ambuya, ndi urunji kwaku Chiuta wa utaski wake.

⁶ Uwu ndi mgonezi wa ŵakumpenja; wa ŵakulembe chisku chaku Chiuta waku Yakobe.

⁷ Yinuskani mwa malikomo mitu yinu! Ndi mujiyinuske, mwa visasa vya mwaka! Kuti karonga wa unkhankhu waseremo.

⁸ Njani karonga wa unkhankhu? Ambuya, anthazi ndi akulimba, Ambuya, akulimba mu kurwana!

⁹ Yinuskani mwa malikomo mitu yinu! Ndi mujiyinuske, mwa visasa vya mwaka! Kuti karonga wa unkhankhu waseremo.

¹⁰ Njani uyu karonga wa unkhankhu? Ambuya ŵazinkhondo, ndiwo karonga wa unkhankhu!