Sumu 22 - Tonga Bible 1986

Nkhuta ya urwirwi, ndi sumu ya marumbu

Ku wakumba mura; pa Ayelete-hashshahari. Sumu yaku Davidi

¹ Chiuta wangu, Chiuta wangu, mwandisiyiyanji? Kumbi mwajariyanji kutali ku kundovya, ku mazu gha kutamantha kwangu?

² Mwa Chiuta wangu, ndidana ndi msana, kweni kuti mutamuka cha; ndipo ndi usiku, kweni chipumulo kulivi.

³ Ndipuuli, Imwe ndimwe ŵatuŵa, ŵakuja pa marumbu ghaku Yisraele.

⁴ Auskefwe ŵangugomekezga mwaku imwe, ŵangugomekezga, ndipo munguŵapozomoska.

⁵ Ŵangubongole kwaku imwe, ŵangutaskika; mwaku imwe ŵangugomekezga, ndipo kuti ŵangurengeskeka cha.

⁶ Kweni ine nde fusi, munthu mweneko cha; chitozeru ku ŵanthurumi, chakuyeyeka ku ŵanthu.

⁷ Wose wo ŵatindiwona ŵatindiwera, ŵanyumba milomo paku ine, ŵapukung'a mitu yawo.

⁸ Ŵatiti, “Wathamiya Ambuya; rekani amupozomoske; amutaske, pakuti akondwere mwaku iyo!”

⁹ Kweni ndipuuli imwe ndimwe mungundito mu chibali; mungundisunga umamphavi ndeche pa maŵe gha ama.

¹⁰ Paku imwe ndinguperekeka kutuwa ku kawi kangu, ndipo kutuwa kunthumbu ya ama Chiuta wangu ndimwe.

¹¹ Mungajanga kutali ndi ine, chifukwa suzgu ye pafupi ndipo wakundovya palivi.

¹² Zandizingirizga nkhuzi zinandi, nkhuzi za nthazi zaku Bashani zandizinga;

¹³ zindiyasamiya milomo yawo, nge ndi nkharamu yakuparuwa ndi yakukoroma.

¹⁴ Ndapungulika nge ndi maji, ndipo vyagweduka vyose viwanga vyangu; mtima wangu waŵa nge ndi phura, wasongonoka mukati mu chifuŵa changu;

¹⁵ nthazi yangu yamira nge ndi zinga, ndi lilime langu lakaniriya ku chavu changu; imwe mutindigoneka mu fuvu la nyifwa.

¹⁶ Inya, ŵagaru ŵandizingirizga; mpingu wa ŵakuchita uheni wandikwetere; ŵarasa manja ghangu ndi marundi ghangu.

¹⁷ Ndingaziŵa kuŵerenga viwanga vyangu vyose; iwo ŵalereska ŵatindithwanukiya;

¹⁸ ŵagaŵizgana minjirira yangu, ndipo pa chivwaru changu ŵapong'a mphenduzga.

¹⁹ Kweni imwe, Ambuya, mungajanga kutali! Mwa chovyo changu, tinthimikani kuzachindovya!

²⁰ Pozomoskani mzimu wangu ku lipanga, umoyo wangu ku nthazi ya garu!

²¹ Nditaskeni ku mlomo wa nkharamu, mzimu wangu wakusuzgika ku masengwe gha njati!

²² Ndikonkhomenge vya zina linu ku ŵabali ŵangu; mukati mu ungano ndikurumbeninge:

²³ Imwe ŵakopa Chiuta, murumbeni! Mose mwa ŵana ŵaku Yakobe, mukankhuskeni, ndipo mani ndi chitenthe, mose mwa ŵana ŵaku Yisraele!

²⁴ Chifukwa kuti wanguyeya chingana nkhutinkha cha suzgu ya wakusuzgika; nanga nkhumubisiya chisku chake, kweni wanguvwa, po wanguliriya kwaku iyo.

²⁵ Rumbu langu mu unganu ukuru lituliya kwaku imwe; marapu ghangu ndifiskenge paurongo pa ŵakumopa.

²⁶ Ŵakusuzgika ŵarghenge, ŵagu tenge; wo ŵatimupenja ŵarumbenge Ambuya! Mitima yinu yije ndi umoyo muyaya!

²⁷ Vigoti vyose vya charu chapasi vikumbukenge ndi kuwere ku Ambuya; ndipo mafuku ghose gha mitundu ya ŵanthu gha sopenge paurongo pinu.

²⁸ Pakuti ufumu ngwa Ambuya, ndipo ausa pa mitundu.

²⁹ Inya, kwaku iyo ŵakotamiyenge pasi wose ŵakujikuzga ŵa charu chapasi; wagwadenge paurongo pake wakusikiya ku fuvu, ndi mweniyo wangatondeka kujisunga wamoyo iyo mweneko.

³⁰ Mbumba yimuteŵetiyenge; ŵanthu ŵazamukamba vya Ambuya ku mgonezi wo utuza,

³¹ ndi kutaula chipozomosko chawo ku ŵanthu wo ŵakapapikanga, kuti iwo ndiwo akuchichita ichi.