Sumu 19 - Tonga Bible 1986

Nchitu ndi mazu vyaku Chiuta

Ku wakumba mura. Sumu yaku Davidi

¹ Machanya ghakonkhoma unkhankhu waku Chiuta; mtambo urongo nchitu za manja ghake.

² Zuŵa ku zuŵa lipereka mazu, usiku ku usiku urongo kuziŵa.

³ Kurongoro kulivi, nanga ndi makani nagho kulivi; mazu ghawo kuti ghavwika cha;

⁴ kweni ndipuuli kakambidu kawo kaporota mu charu chose chapasi, mazu ghawo ku vigoti vyacharu chapasi. Ajinthamo hema la lumwi mwaku gho,

⁵ lo lituwa nge ndimo mwali wanthengwa watuliya mu chipinda chake, ndipo lisekere nge nchinkhara kuchimbiya mu nthowa yake.

⁶ Kutuwa kwake lituliya ku vigoti vya kuchanya, kuzunguliya kwake lifika ku umari waku vyo; ndipo palivi kakubisika ku chifundizi chake.

⁷ Dangu la Ambuya ndamampha kwakufikapo, liwerezgemo mzimu; chisimisimi cha Ambuya nchakukho, muzereza chitumusanduska wazeru;

⁸ virunguchizgu vya Ambuya vyakunyoroka, vyakukondweska mtima; langulu laku Chiuta ndakutowa, lingweruska.

⁹ Nkhwamampha kukankhuska Ambuya, nkhwakujaliriya muyaya; vyeruzgu vya Ambuya vyakuneneska, vyakurunjika kwakufikapo.

¹⁰ Vyakukhumbikwa ukongwa kuruska golide, kuruska golide munandi wakwengeka; vyakusamuka so kuruska uchi, kuruska uchi wakunthona mu chisa.

¹¹ Vitindipaska zeru nda mteŵeti winu; mu kuvisunga mwe mphoto yikuru.

¹² Kweni njani yo wangaziŵa kwananga kwake? Ndingweruskeni ku viheni vyakubisika.

¹³ Kanizgani ndamteŵeti winu kuheni wakujikuzga; kuti vireke kundiusa! Penipo ndipo nkhaŵanga wambura kalema, ndi wambura kafukwa ku kupuruka kukuru.

¹⁴ Mazu gha mlomo wangu ndi marunguruku gha mtima wangu ghaŵe gha marondeka pa maso pinu, Ambuya, jarawi langu ndi mpozomoski wangu.