Sumu 17 - Tonga Bible 1986

Kurombe kutaskika ku ŵakusuzga

Rombu laku Davidi

¹ Avwani vya urunji wangu, Ambuya; tegherezgani ku kuliya kwangu! Avwani rombu langu lo lituwa mu milomo yambura chinyengo!

² Cheruzgu changuchituliye kwaku imwe! Maso ghinu ghawone urunji.

³ Asani imwe mungayesa mtima wangu, asani mungachezga nane ndi usiku, asani mungandipima, kuti mukasaniyangamo uheni cha mwaku ine; mlomo wangu kuti ulakwa cha.

⁴ Nge nkhu nchitu za ŵanthu, ndajisunga ku nthowa za chiwawa; ndi mazu ghamu mlomo winu.

⁵ Menderu ghakukho mu nthowa zinu; marundi ghangu kuti ghateremuka cha.

⁶ Ndidana kwaku imwe, chifukwa mukandimukanga, A Chiuta; sendekiyani gutu linu kwaku ine, vwani mazu ghangu.

⁷ Kwakuziziswa, rongoni chanju chinu chakufikapo, mutaske ndi janja linu lamarghe wo ŵapenja utaski winu ku ŵarwani wawo.

⁸ Ndisungeni nge nkhana ka jisu; mundibise mu mduzi wa mapapiku ghinu,

⁹ ku ŵaheni wo ŵatindinanga, ŵarwani ŵa umoyo wangu wo ŵatindizingirizga.

¹⁰ Walivi lisungu mumitima yawo; ndipo ndi milomo yawo ŵakamba wakujikuzga.

¹¹ Ŵatindiphwatiya pasi; watindizingirizga maso ghawo ghe dodoli paku ine kuti ŵandipong'e pasi.

¹² Ŵayana nge ndi nkharamu yo yinweka kuparuwa, nge ndi nkharamu ya mpupuka yakukhazga mwakubisama.

¹³ Sokani, Ambuya! Muŵajarizge, muŵawiskiye pasi! Pozomoskani umoyo wangu ku muheni ndi lipanga linu,

¹⁴ ku ŵanthurumi ndi janja linu, A Chiuta, ku ŵanthurumi wo chigaŵa chawo mbumoyo wamu charu ichi. Mphanyi nthumbu yawo mwayizaza ndi vyo imwe mwaŵaŵikiya; ŵana ŵawo ŵagute kwakurutizga; mphanyi malitema ghawo ŵaghasiriya vyo iwo ŵasiyako.

¹⁵ Nge nkhwaku ine, ndikadodoleskanga chisku chinu mu urunji; penipo ndiyuka, ndikakhorwanga ndi kawonekedu kinu.