Sumu 148 - Tonga Bible 1986Kudana chilengiwa chose kurumba Ambuya 1 Rumbani Ambuya! Rumbani Ambuya kutuliya kuchanya, arumbeni mu machanya kuchanya! 2 Arumbeni mose mwa ŵangelo ŵawo, arumbeni mose mwamaŵanja ghawo! 3 Arumbeni, dazi ndi mwezi; arumbeni, mwa nyenyezi za kuŵala! 4 Arumbeni, mwa machanya kuchanya, mwa maji gha pachanya pa mtambo! 5 Vyose virumbe zina la Ambuya! Angulangula, ndipo vingulengeka; 6 ndipo akuvikhozga muyaya ndi muyaya, akuvipaska langulu lawo lo kuti vingajumpha cha. 7 Rumbani Ambuya kutuwa ku charu chapasi, mwa vyakuja mu maji ndi zindimba zose. 8 Moto ndi fukunyira, nyankhuŵinda ndi chiuli, mphepo za nthazi zakuvwiya langulu lake! 9 Mapiri ndi mitunthu, miti ya kupasa vipasi ndi masidara ghose! 10 Nyama zose, zakuŵeta ndi za mdondo, vyakukwaŵa pasi ndi viyuni viyo! 11 Murumbeni, ŵakaronga ndi ŵanthu wose, mafumu ndi ŵakuwusa wose ŵacharu; 12 ŵanyamata ndi ŵamwali, makhongwe pamoza ndi ŵana nawo! 13 Wose ŵarumbe zina la Ambuya, pakuti zina lawo pe ndilo le pachanya; unkhankhu wawo we pachanya pa charu chapasi ndi kuchanya! 14 Asoske pachanya nthazi ya ŵanthu ŵawo, rumbani chifukwa cha ŵatuwa ŵawo, chifukwa cha ŵanthu ŵaku Yisraele, khamu lapa mtima wawo. Rumbani Ambuya! |
Bible Society of Malawi
Bible Society of Malawi