Sumu 147 - Tonga Bible 1986

Kurumba chiwezga cha Yerusalemu, ndi Usakati wake

¹ Rumbani Ambuya! Pakuti nkhwamampha kukoŵere Chiuta widu; chifukwa ngwa wezi, ndipo sumu ya rumbu njakunozga.

² Ambuya azenga so Yerusalemu; awezga ŵakuparghang'ika ŵaYisraele.

³ Achizga mitima ya kusweka, ndi kumanga mabara ghawo.

⁴ Aŵerenga unandi wa nyenyezi ndi kuzidana mazina yimoza ndi yimoza.

⁵ Mbakuru Ambuya, ndi anthazi zikuru; kuwamo kwawo nkhwambura wakonkhomeka.

⁶ Akwezga akujiyuyuwa, kweni asiskiya pasi ŵaheni.

⁷ Mbiyani Ambuya sumu zakurumba; koŵereni Chiuta widu ndi bangwi.

⁸ Ngwakukukiska mabingu mu malo gha kuchanya, wapaska vuwa ku charu, wamezga uteka mu mitunthu.

⁹ Wapaska vinyama kurgha kwawo, ndi kurghiska ŵana ŵachahole ŵachiliya.

¹⁰ Likondwa lake kuti lemu ŵakavalo ŵanthazi cha, nanga nchimwemwe chake mu marundi gha munthu;

¹¹ Kweni Ambuya akondwere ndi ŵakuwopa, wo ŵagomekezga mu chanju chawo chakufikapo.

¹² Rumbanga Ambuya, Yerusalemu! Rumbanga Chiuta wako, Zioni!

¹³ Ndiyo wasunga gha nthazi malikomo ghako; watumbika ŵana ŵako mukati mwako.

¹⁴ Wasunga umampha mphaka zako; kukugutiska ndi trigu wamampha kwakuruska.

¹⁵ Wapereka langula pa charu; mazu ghake ghachimbiya ruŵi.

¹⁶ Wapaska nyankhuwinda nge ndi weya; waparghang'a chiulu nge ndifuvu.

¹⁷ Watuma matalala nge ndi livuvu; palivi nanga njumoza yo wangakhwima asani watuma mphepo yakuzizira!

¹⁸ Wapaska langulu, ndipo visongonoka, watuma mphepo, ndipo maji ghataŵala.

¹⁹ Wapaska makani ghake kwaku Yakobe, virunguchizgu ndi marangu ghake kwaku Yisraele.

²⁰ Walivi kuchita ichi ku mitundu yinyake; kuti ŵaziŵa cha malangulu ghake. Rumbani Ambuya!