Sumu 145 - Tonga Bible 1986

Kuthokoza Chiuta chifukwa cha umampha wake ndi nthazi yake

Sumu ya rumbu; yaku Davidi

¹ Ndikankhuskenge imwe, Chiuta wangu ndi karonga; nditumbikenge zina linu muyaya ndi muyaya.

² Ndiwongenge imwe zuŵa ndi zuŵa; ndimurumbeninga muyaya ndimuyaya.

³ Mbakuru Ambuya, ndipo mbakwenere kurumbika ukongwa; ukuru wawo ngwambura kupenjeka.

⁴ Vyo mwachita vikarumbikanga kutuwa ku mgonezi umoza kuya ku mgonezi unyake; ŵataulenge vya milimu yinu ya nthazi.

⁵ Ine ndirungurukenge vya unkhankhu ndi ukaronga winu, ndi nchitu zinu zakuziziswa.

⁶ Ŵanthu ŵakambenge vya milimu yinu ya nthazi, ine ndimemezenge ukuru winu.

⁷ Ŵakakambanga ukongwa pa kukumbuka umampha winu wakufikapo, ndipo ŵakasamphuskanga mazu pakumbiya urunji winu.

⁸ Mbakwanja ndi ŵalisungu Ambuya, mba chizita mu kukwiya kweni akuzara chifundu.

⁹ Ambuya mbamampha kwaku wose, ndi achitima paku vyose vyo akulenga.

¹⁰ Nchitu zinu zose, Ambuya ziwongenge imwe, ndipo ŵatuŵa ŵinu ŵatumbikenge imwe!

¹¹ Ŵakakambanga ndi unkhankhu wa ufumu winu, ndikurongoro vya mazaza ghinu,

¹² alinga kuti ŵana ŵa ŵanthu ŵaziŵe nchitu zinu zanthazi, ndi ukhankhu wa mazaza gha ufumu winu.

¹³ Ufumu winu ngwamuyaya, ndipo kuusa kwinu nkhwa migonezi ndi migonezi. Ambuya mbakongorekwa mu mazu ghawo ghose, ndi amampha mwaku chose cho achita.

¹⁴ Ambuya avikiriya wose wo watuwa, akwezga wose ŵakuyuyulika.

¹⁵ Maso ghaku vyose ghalereska kwaku imwe, ndipo po vikhumba kurgha mutivipaska.

¹⁶ Mutivipaska kurgha kunandi, ndi kugutiska khumbiro la chakututa che chose.

¹⁷ Ambuya mbakurunjika mu nthowa zawo zose, mbalisungu mu nchitu zawo zose.

¹⁸ Ambuya epafupi kwaku wose wo ŵatiŵadana, wo ŵatiŵadana mu uneneska.

¹⁹ Afiska likhumbira laku wose wo ŵati ŵawopa; atuvwa kuliya kwawo ndi atiŵataska.

²⁰ Ambuya avikiriya wose wo atiŵanja, kweni akaparghang'anga ŵaheni wose.

²¹ Ndirumbenge Ambuya nyengo yose; vyamoyo vyose virumbe zina lawo lakupaturika muyaya ndi muyaya.