Sumu 144 - Tonga Bible 1986

Kurombe utaski: kaŵidu ka ŵanthu ŵaku kondwa

Sumu yaku Davidi

¹ Atumbikike Ambuya, jarawi langu wo atindisambizga kurwa nkhondo, ndi minwe yangu kupota homwa.

² Ndiwo jarawi langu, ndi linga langu; linga langu lakukho ndi mtaski wangu, nguru yangu mwaku ŵeniwo ndidingang'a athereske mitundu pasi pawo.

³ Ambuya, ndiyani munthu kuti mumukumbuke; pamwenga mwana wa munthu kuti mumughanaghane?

⁴ Walingana waka ndi mvuchi munthu, mazuŵa ghake ghenge nkhujumpha kwa chiduzi.

⁵ Ambuya, kungunuwani mtambo, sikiyani pasi; ghakoni mapiri, ndipo ghakatuzganga usi.

⁶ Mwetuskani malimphezi, muŵambininiske, pong'ani mivwi yinu, ndipo muŵadikiske!

⁷ Kutuwa kuchanya tambaruwani janja linu, ndituzgeni mu ndimba ya maji, ndinditaskeni; ndipozomoskeni ku janja la ŵalendo,

⁸ ŵeniwo kuti ŵakambapo uneneska cha, wo janja lawo la marghe ndi janja la marghe la utesi.

⁹ Ndimbiyenge imwe sumu yifwa, A Chiuta; ndimbiyenge imwe pa bangwi wa malisinga chumi, ndimbiyenge imwe sumu yifwa, A Chiuta;

¹⁰ mupaska upundi ku ŵakaronga, ndi kuwombo mteŵeti winu Davidi.

¹¹ Nditaskeni ku lipanga likari, ndiwomboni ku janja la ŵalendo, ŵeniwo kuti ŵakamba uneneska cha, wo janja lawo la marghe ndi janja la marghe la utesi.

¹² Mphanyi ŵana ŵanthurumi ŵidu mu unyamata wawo ŵaŵa nge ndi mbeu ya kukuwa kali, ŵana ŵanthukazi ŵidu ŵaŵe ulaka ndi mizati ya pa nyondo, yakusemeke kunozeska nyumba ya chifumu;

¹³ nkhokwi zidu zizaze ndi vyakurgha vya mitundu mitundu. Mberere mu malisuwa ghidu zipapenge ŵana vikwi vya vikwi chumi.

¹⁴ Ng'ombe zidu zipaskenge mwandanu unandi, kwambura yakusoposka nanga nkhutondeka kubala; murŵangurwi ŵidu mureke kuvwika kuliya kwa soka!

¹⁵ Ŵakukondwa mbanthu ŵeniwo vituŵawiya vitumbiku ivi! Ŵakukondwa mbanthu ŵeniwo Chiuta wawo ndi Ambuya!