Sumu 141 - Tonga Bible 1986

Rombu la mazulo la kutozgeka ndi kusungika

Sumu yaku Davidi

¹ Ndidana kwaku imwe, Ambuya, ndovyeni sono! Tegherezgani po ndidana kwaku imwe.

² Rondeni rombu langu nge nchakusunkhizga paurongo pinu, ndi kusoska kwa manja ghangu ngendi sembe ya mazulo.

³ Ambuya, ŵikani mlinda pa mlomo wangu, mlinda pa khomo la milomo yangu.

⁴ Ndisungeni ku kuchita uheni we wose, kujitangwamiska mu nchitu ziheni, pamwenga kusangana ndi ŵanthu ŵaheni mu mauheni ghawo. Ndireke kusangana nawo mu madghera ghawo!

⁵ Munthu wamampha wandilange ndi kundichenya mwa ulemu, kweni kuti ndizomerezgenge muheni kundipaka mafuta ku mutu cha, chifukwa nyengo yose ndirombe pa nchitu zawo ziheni.

⁶ Penipo ŵaperekeka ku ŵeruzgi wo ŵakaŵeruzganga, po ndipo ŵanthu ŵazomerenge kuti mazu gha Ambuya ngakuneneska.

⁷ Nge ndi nkhuni yo yafyoka ndi kugaŵikana tumana-tumana, viyo ndimo viwanga vyawo vikambininikiyanga pa mlomo wa muunda.

⁸ Kweni ine, Ambuya Chiuta, ndilereska kwaku imwe; mwaku imwe ndipenja kudingang'a; rekani kuzomera kuti ndireke kuvikirika!

⁹ Ndivikiriyeni ku viŵana vyo ŵakundithya ku vikhwiriki vya ŵakuchita utimbanizi.

¹⁰ Ŵaheni ŵawe mu virepa vya ŵeneko, penipo ine ndapozomoka.