Sumu 13 - Tonga Bible 1986

Kurombe chovyo mu suzgu

Ku wakumba mura. Sumu yaku Davidi

¹ Mpaka zuŵanji Ambuya? Kumbi mundiruwenge muyaya? Mpaka zuŵanji mundibisiyenge chisku chinu?

² Mpaka zuŵanji ndivwenge kuŵaŵa mu mzimu, ndi kuŵa wa chitima mu mtima zuŵa lose? Mpaka zuŵanji wakwezgekenge pachanya pangu wakupindikana wangu?

³ Ghanaghanani ndipo mundamuke, Ambuya Chiuta wangu; ngweruskani maso ghangu, vinu ndingagona tulo twa nyifwa;

⁴ vinu murwani wangu wanganena, “Ndamugoda”, vinu wakupindikana wangasekere chifukwa ndasukunika.

⁵ Kweni ine ndagomezga mu lisungu la chanju chinu; mtima wangu ukondweriyenge mu utaski winu.

⁶ Ndikoŵeriyenge ku Ambuya, chifukwa andichitiya kwa wanangwa.