Sumu 124 - Tonga Bible 1986

Kurombe utaski ku ŵamawongo

Sumu ya makwerero; yaku Davidi

¹ Asani Ambuya ŵengavi kuŵa kuchiri kwidu, wanene viyo sono Yisraele!

² Asani Ambuya ŵengavi kuŵa kuchiri kwidu, po ŵarwani ŵidu ŵangutiyukiya

³ mphanyi ŵangutimeza taŵamoyo, po ukari wawo ungukore paku ifwe;

⁴ mphanyi tingukukurwa ndi zande, mphanyi maji ghangutibizga,

⁵ mphanyi maji ghakujikuzga ghangwenda pachanya pidu.

⁶ Atumbikike Ambuya, wo ŵalivi kutipereka nge ndi nyama ku minyu ghawo!

⁷ Tapozomoka nge nkhayuni mu chiŵana cha wakunthya; chiŵana chadumuka, ndipo ifwe tapozomoka!

⁸ Chovyo chidu Chituliya ku Ambuya, wo akwata kuchanya ndi charu chapasi.