Sumu 121 - Tonga Bible 1986

Ambuya aphwere ŵanthu ŵawo

Sumu ya makwerero

¹ Ndiyinuskiya maso ghanguku mapiri; chituliyenge pani chovyo changu?

² Chovyo changu chituliya ku Ambuya, akwata kuchanya ndi charu chapasi.

³ Iwo kuti azomerezgenge rundi lako kusukunika cha, iwo akukusunga iwe kuti akasiwanga cha.

⁴ Ehe, iwo akusunga Yisraele kuti akasiwanga nanga nkhugona cha.

⁵ Ambuya asungenge iwe; Ambuya ndi mduzi wako ku janja lako la marghe.

⁶ Dazi kuti likupwetekengi cha ndi msana, nanga ndi mwezi ndi usiku.

⁷ Ambuya akuvikiriyenge ku urwani wose; asungenge umoyo wako.

⁸ Ambuya akuvikiriyenge uchituwa ndiuchisere, kutuwa kunu ku sono mpaka ku muyaya.