Sumu 119 - Tonga Bible 1986Dangu la Ambuya 1 Ŵakutumbikika ndi ŵeniwo ŵalivi kalema mu nthowa yawo, wo ŵatenda mu dangu la Ambuya. 2 Ŵakutumbikika mbeniwo ŵasunga visimisimi vyawo, wo ŵati ŵapenja ndi mtima wawo wose. 3 Nadi kuti ŵachita kubende cha; ŵatenda mu nthowa ya Ambuya. 4 Imwe mwatipaska marangu ghinu kuti tighavwiye ndi chivwanu. 5 Mphanyi nthowa zangu zinguŵa zakufikapo pa kusunga marangu ghinu! 6 Asani ndiphwere visimisimi vinu vyose, ipo kuti ndikalengeskekanga cha. 7 Po ndisambira vyeruzgu vinu vyakurunjika, ndikurumbeninga ndi mtima wakunyoroka. 8 Marangu ghinu ndikavwiyanga; mungandipatiyanga limu cha! Muvwiyu ku dangu la Ambuya 9 Muhurwa wangatozga uli nthowa yake? Pakuvwiya visimisimivinu. 10 Nditimupenjani ndi mtima wangu wose; mungandizomerezganga cha kureka kuvwiya malangulu ghinu! 11 Mazu ghinu ndasunga mu mtima wangu, alinga kuti ndireke kumunangiyani imwe. 12 Wakutumbikika ndimwe, Ambuya: ndisambizgeni virunguchizgu vinu! 13 Ndiwerezgengepo so kukamba, marangu ghose gho mwandipaska. 14 Ndikondwere pa kurondo visimisimi vinu, kwakuruska kuŵa ndi usambasi unandi. 15 Ndirungurukenge ndi viringuchizgu vinu; ndikulereska pa nthowa zinu. 16 Ndendi likondwa mu marangu ghinu, kuti ndiruwenge visimisimi vinu cha. Likondwa lamu dangu la Ambuya 17 Chitiyani umampha mteŵeti winu alinga kuti ndiŵe wamoyo ndi kusunga mazu ghinu. 18 Jurani maso ghangu, mwakuti ndilereske vyakuziziswa vya mu dangu linu. 19 Nde mlendo mu charu chapasi; mungabisanga malangulu ghinu kwaku ine! 20 Mtima wangu usweka ndi linweka, nyengo zose ndinweke kuziŵa vyeruzgu vinu. 21 Muchenya ŵakujikuzga; mba kutembeka wo ŵapatukako ku marangu ghinu. 22 Ndituzgeniko ku chisunjizga chawo ndi kuyeya kwawo, chifukwa ine ndasunga visimisimi vinu. 23 Inya nanga ŵakuwusa ŵawungana ndi kundichitiya chiŵembu, nda mteŵeti winu, ndisambirenge virunguchizgu vinu. 24 Visimisimi vinu vitindikondweska; ndivyo vitindipangizga. Kukhozgeka kuvwiya dangu la Ambuya 25 Mzimu wangu umeremete ku fuvu; mundisisipuske kwakulingana ndi mazu ghinu! 26 Po ndingusumuwa vyose vyo ndikuchita, imwe mungundamuka; ndisambizgeni virunguchizgu vinu! 27 Ndiziŵiskeni nthowa ya malangulu ghinu, ndipo ndirungurukenge ndi nchitu zinu zakuziziswa. 28 Mzimu wangu usongonoka ndi chitima; ndinthaziskeni, kwakuyana ndi mazu ghinu. 29 Tuzganiko kwangu, nthowa zakupusika; ndipo kwa wezi mundisambizge dangu linu! 30 Ndasankha nthowa ya ukongorekwa; malangulu ghinu ndaŵika paurongo pangu. 31 Ambuya, ndameremete ku visambizgu vinu; rekani kuzomera kuti ndilengeskeke! 32 Ndivwiyenge malangulu ghinu ndi mwamphu wose, chifukwa mukandipaskanga kuwamo kukuru. Rombu lakuziŵiska 33 Ambuya, ndisambizgeni, kang'anamulidu ka marangu ghinu, ndipo ndighavwiyenge nyengo yose. 34 Ndipaskeni kuwamo, kuti ndisunge dangu linu: ndikalisunganga ndi mtima wangu wose. 35 Mundirongozge mu nthowa ya malangulu ghinu, chifukwa mwaku ghenigho ndimu ndikondwere. 36 Mtima wangu urazge ku visimisimi vinu, kwakuruska kukwanduwa usambasi. 37 Wezgani maso ghangu ku kulereska vyo vyambura chanduwu; ndipaskeni umoyo mu nthowa zinu. 38 Sungani phanganu linu, ku mteŵeti winu, lenilo mupaska kwaku wo ŵatopa imwe. 39 Nditaskeni ku matozu gho nditopa; pakuti visimisimi vinu vyamampha! 40 Ehe, ndikhumbira virunguchizgu vinu; mu urunji winu ndipaskeni umoyo! Kugomekezga dangu la Ambuya 41 Ambuya, chanju chinu chize paku ine, ndipo nditaskeni kwakulingana ndi phanganu linu. 42 Sono ndiziŵa kuŵamuka wo ŵatinditoza, chifukwa ndigomekezga mu mazu ghinu. 43 Ndizomerezgeni kukamba uthenga wa uneneska nyengo yose, chifukwa chigomezgu changu che mu vyeruzgu vinu. 44 Ndikasunganga dangu linu nyengo yose, muyaya ndi muyaya! 45 Ndipo ndikajanga mu wanangwa wakufikapo, chifukwa ndesa kuvwiya visimisimi vinu. 46 Malangulu ghinu ndikambenge ku ŵakaronga, ndipo kuti ndiŵenge wasoni cha. 47 Mukuvwiya malangulu ghinu ndikankhaŵiya, chifukwa ndigho nditanja. 48 Nditumbika ndi kwanja malangulu ghinu; mu virunguchizgu vinu ndirungurukenge. Chigomezgu cha mu dangu la Ambuya 49 Kumbukani phanganu linu, ku mteŵeti winu; pakuti landipaska chigomezgu. 50 Nanga ndi mu suzgu yangu ndinguŵa wakusangaruka, chifukwa phanganu linu likundipaska umoyo. 51 Ŵakujikuzga ŵandiwera, kweni kuti ndapatukako cha ku dangu linu. 52 Ndichikumbuka virunguchizgu vyo mukundipaska kali, ndi sangaruka, Ambuya. 53 Ndizazika ndi ukari chifukwa cha ŵaheni, wo ŵatuswa dangu linu. 54 Virunguchizgu vinu vyaŵa sumu zangu mu nyumba ya ulendo wangu. 55 Ambuya, mu usiku ndighanaghana ndi imwe, ndipo ndisunga dangu linu. 56 Ichi nchimwemwe changu: chakuti ndasunga marangu ghinu. Kujipereka ku dangu la Ambuya 57 Ndimwe pe ndikhumba, Ambuya; ndipangana kuvwiya marangu ghinu. 58 Ndipempha wezi winu ndi mtima wangu wose; kwakulingana ndi phanganu linu, ndichitiyeni wezi! 59 Po ndighanaghana ndi nthowa zinu, ndiwezge marundi ghangu ku visimisimi vinu. 60 Kwambura kuswera, nditinthimika kuvwiya malangulu ghinu. 61 Nanga vingwe vya ŵaheni vyandizinga, kuti ndiruwa dangu linu cha. 62 Mukati mu usiku ndiyuka kutumbika imwe, chifukwa vyeruzgu virunji. 63 Nde bwezi laku wose wo ŵatopa imwe; laku wose wo ŵavwiya marangu ghinu. 64 Ambuya, charu chose chazala chifundu chinu; ndisambizgeni malangulu ghinu! Kuzirwa kwa dangu la Ambuya 65 Ambuya, kwakuyana ndi mazu ghinu, mwachita umampha, kwaku ndamteŵeti winu. 66 Ndisambizgeni vinjeru ndi cheruzgu chamampha chifukwa ndagomekezga mu vilangulu vinu! 67 Mwenga mundandilange ndajendiyanga bweka, kweni sono ndivwiya mazu ghinu. 68 Mwe amampha, ndi aulemu; ndisambizgeni vilangulu vinu! 69 Ŵanthu ŵakujikuzga ŵakamba vyautesi paku ine, kweni ndi mtima wangu wose ndisunga virunguchizgu vinu; 70 mtima wawo ngwakununa nge ndi mafuta, kweni ine likondwa langu le mu dangu linu. 71 Kulangika kwangu kungundiŵiya kwamampha, alinga kuti ndisambire vilangulu vinu. 72 Dangu lo imwe mupaska ndakuzirwa ukongwa kwangu, kwaku ruska chuma chose mu charu chapasi. Urunji wa dangu la Ambuya 73 Mukundilenga ndimwe; ndipaskeni kuziŵa, mwakuti ndisambire marangu ghinu. 74 Wo ŵatopa imwe ŵachindiwona ŵakondwenge, chifukwa ndigomekezga mu mazu ghinu. 75 Ndiziŵa Ambuya, kuti vyeruzgu vinu vyakurunjika, mungundilanga chifukwa mwe amagomekezgeka. 76 Chifundu chinu chindisangaruske kwakuyana ndi phanganu linu ku mteŵeti winu. 77 Ndichitiyeni lisungu, ndipo ndiŵenge wamoyo, pakuti mu dangu linu mwe kukankhaŵiya kwangu. 78 Ŵalengeskeke ŵakujikuzga, pakuti ŵatindisuska kwa utesi; kweni ine, ndirungurukenge ndi virunguchizgu vinu. 79 Zomerani kuti wose wo ŵatopa inwe ŵang'anamukiye kwangu, mwakuti ŵaziŵe visimisimi vinu. 80 Mtima wangu uvwiye malangulu ghinu, mwakuti ndireke kulengeskeka. Kurombe kutaskika 81 Mzimu wangu utakamiya pakunweka utaski winu; chigomezgu changu che mu mazu ghinu. 82 Maso ghangu ghavuka kukhazga vyo imwe mukupangana, ndifumba, “Kumbi mukandisangaruskanga zuŵanji?” 83 Pakuti ndasanduka wa waka nge ndi thumba la chikopa la vinyo lakuguga; kweni ndipuuli kuti ndaruwa vilangulu vinu cha. 84 Ndikalindizganga mpaka zuŵanji ndamteŵeti winu? Wo ŵatindizingizga mukaŵalanganga zuŵanji? 85 Ŵakujikuzga, wo kuti ŵavwiya dangu linu cha, ŵandikumbiya mbuna. 86 Malangulu ghinu ghose ngauneneska; ndovyeni, ŵanthu ŵandiwemba kwa utesi! 87 Ŵayisaniya limu nthowa yakundibayiya, kweni kuti ndajowo virunguchizgu vinu cha. 88 Chifukwa cha chanju chinu chakufikapo, mundisunge wamoyo, alinga kuti ndisungenge visimisimi vinu. Chivwanu mu dangu la Ambuya 89 Ambuya, mazu, ghinu ghakajaririyanga muyaya; ghakukhozgeka kuchanya. 90 Umagomekezgeka winu ngwa mgonezi ndi mgonezi; mwajarika charu mu malo ndipo chakho. 91 Vinthu vyose vyakho mpaka ku zuŵa lino chifukwa cha kulangula kwinu, chifukwa vinthu vyose mbateŵeti ŵinu. 92 Asani dangu linu lengavi kuŵa chimwemwe changu, mphanyi ndikufwa mu kulangika kwangu. 93 Kuti ndikapatanga virungu chizgu vinu cha nyengo yose, chifukwa mwaku vyenivyo imwe mwandisunga wamoyo. 94 Nde winu, nditaskeni! Chifukwa ndesa kusunga virunguchizgu vinu. 95 Ŵanthu ŵaheni ŵakhazga kundibaya, kweni ine ndighanaghanenge mu marangu ghinu. 96 Ndasambira kuti palivi cho nchakurunjika kwakufikapo; kweni langulu linu lirivi chigoti. Chanju cha mu dangu la Ambuya 97 A, nditanja mbwenu dangu linu! Ndighanaghana nalo zuŵa lose. 98 Langulu linu litindipaska zeru kwakuruska ŵarwani ŵangu wose. 99 Ndendi vinjeru kwakuruska ŵasambizgi ŵangu wose, chifukwa ndighanaghana mu virungu chizgu vinu. 100 Ndiwamo ukongwa kwakuruska makhongwe, chifukwa ndivwiya malangulu ghinu. 101 Ndakanizga marundi ghangu ku nthowa zose ziheni, chifukwa ndikhumba kuvwiya mazu ghinu. 102 Kuti ndapatukako cha ku visimisimi vinu, pakuti ndimwe mukundisambizga. 103 Nako nkhunowa kwa mazu ghinu pakughesa; mu mlomo wangu ghanowa kwakuruska uchi! 104 Mu marangu ghinu nditanduwamo zeru, chifukwa cho nditinkha nthowa zose ziheni. Ukweru wa mu dangu la Ambuya 105 Mazu ghinu ndi nyali kumarundi ghangu, ndi ukweru wa nthowa yangu. 106 Ndarapa rapu ndipo ndalikhozga, kuvwiya virunguchizgu vinu virunji. 107 Ndasuzgika ukongwa; kwakuyana ndi mazu ghinu Ambuya, ndisisipuskeni! 108 Rondani mipasku yangu ya kurumba, Ambuya, ndipo ndisambizgeni vyeruzgu vinu. 109 Umoyo wangu wemu janja langu zuŵa ndi zuŵa; kweni dangu linu kuti ndiruwa cha. 110 Ŵaheni ŵandithya chiŵana, kweni kuti ndaranda pa malangulu ghinu cha. 111 Visimisimi vinu nchihara changu cha muyaya; ndivyo likondwa la mtima wangu. 112 Mtima wangu wasankha kuvwiya vyeruzgu vinu, mpaka pa zuŵa la nyifwa yangu. Kudekha mu dangu la Ambuya 113 Nditiŵatinkha ŵanthu ŵa mitima yiŵi, kweni nditanja dangu linu. 114 Ndimwe chakubisamamo changu ndi nguru yangu; ndigomekezga mu mazu ghinu. 115 Tuwaniko kwangu, mose mwaŵakuchita utimbanizi, mwakuti ndisungenge malangulu ghaku Chiuta wangu. 116 Ndichirikiriyeni kwakuyana ndi phanganu linu, mwakuti ndiŵe wamoyo, mu chigomezgu changu ndireke kurengeskeka. 117 Ndichirikiriyeni, alinga kuti ndiŵe wakudekha, ndipo ndidaŵirenge vyakukombo vinu mazuŵa ghose. 118 Mupata wose ŵambura kuvwiya marangu ghinu; inya nthowa zawo za ukazuzi zawaka. 119 Ŵaheni wose mu charu chapasi mutiŵawona nge ndi muthovu; chifukwa ichi ine nditanja visimisimi vinu. 120 Chifukwa chaku imwe, ndichita mantha, ndazazika ndi chitenthe chifukwa cha vyeruzgu vinu. Muvwiyu ku dangu la Ambuya 121 Ndachita cho nchakwenere ndi chamampha; rekani kunditaya ku ŵarwani ŵangu! 122 Muŵiye mteŵeti winu ndindira ku umampha; rekani kuzomerezga ŵanthu ŵaheni kundisuzga. 123 Maso ghangu ghavuka kulereze uwombozi winu, kulereze kufiskika kwa chipozomosku chinu chirunji cho mukupangana. 124 Ndichitiyeni kwakulingana ndi chanju chinu chikuru, ndipo ndisambizgeni malangulu nginu. 125 Ndine mteŵeti winu; mundipaske kuwamo, mwakuti ndiziŵiske visimisimi vinu! 126 Ambuya ndi nyengo yakuti muchiti nchitu, chifukwa dangu linu lasweka. 127 Nditanja malangulu ghinu kwakuruska golide, kwakuruska golide lakwengeka. 128 Viyo ndirongozga michapu yangu mu virunguchizgu vinu vyose; nthowa zose ziheni nditinkha. Linweka la kuvwiya dangu la Ambuya 129 Visambizgu vinu vyakuziziswa; chifukwa cho ndituvivwiya ndi mtima wangu wose. 130 Kupataula kwa mazu ghinu kupaska ukweru, kupaska zeru kwaku wo mbajira. 131 Ndi mlomo wakujurika ndinguyasama, mu linweka langu lamu malangulu ghinu. 132 Ng'anamukiyani kwangu ndipo ndichitiyeni wezi, nge ndimo mutiŵachitiya ŵakwanja imwe. 133 Ndikhozgeni ndingawa, nge ndimo mukukambiya; ndipo ndireke kuruskika ndi uheni. 134 Ku ŵakundikandirizgiya pasi nditaskeni, alinga kuti ndisungenge visimisimi vinu. 135 Nditumbikeni ndi uŵapo winu, ndipo ndisambizgeni marangu ghinu. 136 Masozi ghangu ghadika nge ndi msinji, chifukwa ŵanthu kuti ŵasunga dangu linu cha. Urunji wa dangu la Ambuya 137 Ndimwe akurunjika, Ambuya, ndipo marangu ghinu ngakurunjika. 138 Vyeruzgu vyo mwapaska vyamampha ndi vyakurunjika. 139 Ukari wangu ukole nge ndi moto mukati mwangu, chifukwa wakupindikana ŵangu kuti ŵaphwere vilangulu vinu cha. 140 Ndakufikapo mbwenu phanganu linu! Mteŵeti winu watitanja ukongwa! 141 Nde kanthu waka ndi wakunyozeka, kweni kuti ndipata vyeruzgu vinu cha. 142 Urunji winu ukajaririyanga muyaya, ndipo dangu linu ndakuneneska. 143 Suzga ndi urwiri vyandiwiya, kweni malangulu ghinu ghatinditore chimwemwe. 144 Virungu chizgu vinu vyakurunjika muyaya; ndipaskeni kuwamo, mwakuti ndiŵe ndi umoyo. Rombu la kutaska 145 Ndi mtima wangu wose ndidana imwe; ndamukeni, Ambuya, ndipo ndisungenge malangulu ghinu! 146 Ndidana kwaku imwe; nditaskeni, ndipo ndirondonge visimisimi vinu! 147 Lumwi lenga lindatuwe ndidaniya kwaku imwe chovyo; chigomezgu changu ndiŵika mu mazu ghinu. 148 Usiku wose ndigona tulo cha, ndirunguruka ndi phanganu linu. 149 Ndivweni, Ambuya, kwakulingana ndi chanju chinu chikuru; kwakuyana ndi umampha winu, sungani umoyo wangu! 150 Ŵakundizingizga ŵakhazga ŵandere pafupi, ŵanthu wo kuti ŵasunga dangu linu cha. 151 Kweni imwe mwe pafupi nane, Ambuya, ndipo malangulu ghinu ghose ngakuneneska. 152 Kali ndikusambira ndi visimisimi vinu; ndipo mukuvijarika kuti vijaririye muyaya. Kupempha chipozomosko 153 Lereskani pa suzgu yangu, ndi nditaskeni, chifukwa kuti ndajowo dangu linu cha. 154 Vikiriyani mlando wangu, ndipo ndisanduskeni mwanangwa; nditaskeni nge ndimo mukupanganirana! 155 Ŵaheni kuti ŵakataskikanga cha, chifukwa kuti ŵapenja marangu ghinu cha. 156 Kweni chisungusungu chinu, Ambuya, nchikuru ukongwa, viyo nditaskeni kwakuyana ndi cheruzgu chinu. 157 Mbanandi ŵakundiŵemba ndi ŵarwani ŵangu, kweni kuvwiya marangu ghinu kuti nditondeka cha. 158 Penipo ndilereska pa ŵakupusika, ndikwiyiskika, pakuti langulu linu kuti ŵasunga cha. 159 Ehe, mo nditanjiya virunguchizgu vinu, Ambuya! Nditaskeni, kwakuyana ndi chifundu chinu. 160 Chisinkhu cha mazu ghinu mbuneneska, ndipo vyeruzgu vinu vyose virunji vya muyaya. Kujipereka ku dangu la Ambuya 161 Ŵanthu ŵanthazi ŵandizingizga kwambura kafukwa, kweni ine mtima wangu utuma pakutumbika dangu linu. 162 Ndikondwere mu mazu ghinu, nge nkhukondwa kwaku yo wasaniya usambasi unandi. 163 Nditinkha ndi kupata mautesi, kweni nditanja dangu linu. 164 Zuŵa ndi zuŵa nditumuwongani kankhonde ndi kaŵi, chifukwa cha vyeruzgu vinu vyakurunjika. 165 Wo ŵatanja dangu linu ŵendi chivekeru chakufikapo, ndipo kulivi ko kakaŵaguŵiskanga. 166 Ndilereze utaski winu, Ambuya, ndipo ndichita malangulu ghinu. 167 Mzimu wangu usunga visimisimi vinu; ndipo nditivyanja ukongwa. 168 Ndivwiya malangulu ndi virungu chizgu vinu; imwe muwona vyose vyo ndichita. Kurombe chovyo 169 Kuliya kwangu kuze paurongo pinu, Ambuya, ndipaskeni kuwamo kwakulingana ndi mazu ghinu! 170 Kuŵeyere kwangu kuze paurongo pinu; nditaskeni kwakulingana ndi mazu ghinu. 171 Ndirumbenge imwe nyengo yose, chifukwa mutindisambizga vyeruzgu vinu. 172 Ndimbenge vya mu dangu linu, chifukwa malangulu ghinu ngakurunjika. 173 Nyengo yose ŵani pafupi kundovya, chifukwa ndasankha malangulu ghinu. 174 Ndinweka chipozomosko chinu, Ambuya! Mu dangu linu ndisaniya chimwemwe. 175 Ndipaskeni umoyo, mwakuti ndimurumbeni imwe, virungu chizgu vinu vindovye! 176 Ndiyingayinga nge ndi mberere yakuranda; viyo zani ndipenjeni, ndamteŵeti winu, chifukwa malangulu ghinu kuti ndaghapata cha. |
Bible Society of Malawi
Bible Society of Malawi