Sumu 118 - Tonga Bible 1986Kuwonga Ambuya chifukwa cha umampha wawo 1 Wongani Ambuya, chifukwa mbamampha; chifukwa ncha muyaya chifundu chawo! 2 Wanene sono Yisraele, “Chifukwa ncha muyaya chifundu chawo.” 3 Yinene nyumba yaku Aroni, “Chifukwa ncha muyaya chifundu chawo.” 4 Ŵanene wose ŵakopa Ambuya, “Chifukwa ncha muyaya chifundu chawo.” 5 Mu soka langu ndingudana ku Ambuya; Ambuya angundamuka, ndi kundiŵika mwanangwa. 6 Ndi Ambuya pamoza nane, kuti nditopa cha; wachitengenji nane munthu? 7 Ambuya ŵe kuchiri kwangu kundovya; ndipo ndikawonanga kuthereskeka kwa ŵarwani ŵangu. 8 Nkhwamampha kudingang'a mwa Ambuya, kwakuruska kugomezga munthu. 9 Nkhwamampha kudingang'a mwa Ambuya kwakuruska kugomezga mu mafumu. 10 Mitundu yose yingundizinga; kweni mu zina la Ambuya ndinguŵaparghang'a! 11 Ŵangundizinga kwetere, kundizinga kose kose; kweni mu zina la Ambuya ndinguŵaparghang'a! 12 Ŵangundizinga nge ndi njuchi, kweni ŵangufya ruŵi nge ndi moto mu minga; ndinguŵadumuwa mu nthazi ya Ambuya! 13 Ndingukoreka kwa kofya pafupi kuwa, kweni Ambuya angudovya. 14 Ambuya ndi nthazi yangu ndi sumu yangu; ndiwo Mtaski wangu! 15 Avwani kukambura kwa likondwa la upundi mu mahema gha ŵarunji: “Janja lakurghiya la Ambuya lachita ichi! 16 Janja lakurghiya la Ambuya lakwezgeka, janja lakurghiya la Ambuya lichita kwakukhuza.” 17 Ine kuti ndikafwanga cha, kweni ndiŵenge wamoyo; ndikambenge vyo Ambuya achita. 18 Ambuya andilanga ukongwa, kweni kuti andipereka ku nyifwa cha. 19 Ndijuriyeni malikomo gha urunji, ndiserenge mwenimo, ndikupereka viwongo ku Ambuya. 20 Ili ndi lokomo la Ambuya; wakurunjika waserenge mwenimo. 21 Ndimuwongani chifukwa mwandamuka, ndipo mwaŵa chipozomosko changu. 22 Mwa wo ŵazengi ŵanguwupata ndiwo wazgoka mutu wa nyondo. 23 Chachitika ndi Ambuya ichi, ndipo nchakuziziswa mu maso ghidu. 24 Ili ndi zuŵa lo Ambuya achita; tangare ndi tikondwe mwaku lo. 25 Titaskeni, tikuŵeyani Ambuya! Ambuya, tikuŵeyani Ambuya! Ambuya, tikuŵeyani, tisakatiskeni! 26 Ngwakutumbikaka yo watuza mu zina la Ambuya! Tikutumbikani kutuwa mu nyumba ya Ambuya. 27 Ambuya ndiyo Chiuta; ndiuo watipaska ukweru. Ndi vivwati vya miti mu manja yambani dghera, kurazga ku masengwe gha chiguŵa! 28 Ndimwe Chiuta wangu, ndiwongenge imwe; ndimwe Chiuta wangu, nditaulenge ukuru winu. 29 Wongani Ambuya, chifukwa mbamampha; chifukwa ncha muyaya chifundu chawo! |
Bible Society of Malawi
Bible Society of Malawi