Sumu 11 - Tonga Bible 1986

Chiuta nchakudingang'amo

Ku wakumba mura. Sumu yaku Davidi

¹ Mwaku Chiuta ndidingang'a; undineniyenge uli iwe kuti, “Thaŵiya ku mapiri nge nchiyuni.

² Pakuti ehe, ŵaheni ŵapinda uta, muvwi ŵakoroŵeka kulisinga, kuti mu mdima ŵapong'e pa ŵakunyoroka mu mtima.

³ Asani viŵanja vibwanganduka, ŵakurunjika ŵangachitanji?”

⁴ Ambuya ŵemu nyumba yawo yakupaturika, chitengu cha Ambuya che mu machanya; maso ghawo ghalereska, vikope vyawo vitesa ŵana ŵa ŵanthu.

⁵ Chiuta watesa ŵarunji ndi ŵaheni, ndipo mzimu wake utinkha wakwanja viwawa.

⁶ Pa ŵaheni wang'iskenge maka gha moto ndi fukunyira; mphepo yakocha yikaŵanga mphoto yawo.

⁷ Chifukwa mbakurunjika Ambuya, atanja nchitu zakurunjika; ŵakunyoroka ndiwo ŵawonenge chisku chawo.