Sumu 108 - Tonga Bible 1986Kurumba Chiuta, ndi kuŵeyere kupunda ( Sumu 57.7-11 ; 60.5-12 ) Sumu yaku Davidi 1 Ndakhozgeka, A Chiuta; ndakhozgeka kwakufikapo! Ndimbenge ndi kurumba imwe! Yuka, wa mzimu wangu! 2 Yuka, wa bangwi wangu ndi kaligu! Ndiyukenge ndi chivivivi! 3 Ndiwongenge imwe mukati mu mitundu, Ambuya! Ndirumbenge imwe mukati mu mafuku! 4 Chifukwa chanju chinu chakufikapo chifika pachanya pa machanya, ukongorekwa winu ku mitambo. 5 Mutumphuskike, A Chiuta, pachanya pa machanya; unkhankhu winu uŵe pa charu chose chapasi! 6 Titaskeni ndi nthazi yinu, ndipo mutamuke, alinga kuti ŵataskike ŵakwanjiwa ŵinu. 7 Mu malo ghake ghakupaturika Chiuta wakamba kuti, “Mu mazaza ndigaŵenge Shekemu, ndi ndipatuliyenge dambo la Sukoto ku ŵanthu ŵangu. 8 Gileada ngwangu, Manase nayo ngwangu; Efraimu nchisoti changu, ndipo Yuda ndi ndodo yangu ya ufumu. 9 Kweni Moabu ndimusanduskenge mbali yangu yakusambiya, ndi Edomu chakutayapo viyato vyangu. Paku Filistia ndikamburiyenge mu upundi.” 10 A Chiuta, ndiyani wanditoriyenge, mu muzi wa linga? Njani yo wakandirongozgiyanga ku Edomu? 11 Kumbi nadi mwatijowo, A Chiuta? Kumbi kuti mukarutanga pamoza ndi nkhondo zidu cha? 12 Tovyeni kurwana ndi wakupindikana, pakuti chovyo cha munthu nchawaka! 13 Ndi Chiuta kuchiri kwidu tikapundanga; chifukwa ndiyo wakathereskanga ŵarwani ŵidu. |
Bible Society of Malawi
Bible Society of Malawi