Sumu 107 - Tonga Bible 1986

BUKU 5 ( Sumu 107—150 ) Ŵanthu ŵawonge Ambuya wo aŵabuwa muvisuzgu vinandi

¹ Wongani Ambuya chifukwa mbamampha; chifukwa ncha muyaya chifundu chawo!

² Ŵanene viyo ŵakuwomboleka ŵa Ambuya, wo aŵawombo ku suzgu,

³ ndi kumuwezgani kutuwa mu vyaru vya chilendo, kutuwa ku vuma ndi ku zambwe, ku nkhonde ndi ku malaŵi.

⁴ Ŵanyake ŵanguyingayinga mu bozwa la chiparamba, ndipo kuti ŵangusaniya nthowa ya ku muzi wakujamo cha.

⁵ Ŵenga ŵanja ndi ŵanyota, ndipo ŵangutaya chigomezgu chose.

⁶ Mu suzgu yawo ŵangubongole ku Ambuya, ndipo anguŵataska mu soka lawo.

⁷ Anguŵarongozga mu nthowa yakunyoroka, mpaka ŵangufika ku muzi wakujamo.

⁸ Ŵawonge Ambuya chifukwa cha chanju chawo chakufikapo, chifukwa cha milimu yawo yakuziziswa pa ŵana ŵa ŵanthu!

⁹ Agutiska wo ŵendi nyota, ndipo ŵanja atiŵazaza ndi vyamampha.

¹⁰ Ŵanyake ŵanguja mu mdima ndi mu munkhorwi, ŵakumangika ŵangusuzgika mu maunyolo;

¹¹ chifukwa ŵangugarukiya marangu gha Wapachanya Limu, ndi kupata virunguchizgu vyake.

¹² Mitima yawo yingulakatuka chifukwa cha nchitu zikuru; ŵanguwa pasi, ndipo pengavi wakuwovya.

¹³ Mu suzgu yawo ŵangubongole ku Ambuya, ndipo anguŵataska mu soka lawo.

¹⁴ Anguŵatuzga mu mdima ndimu munkhorwi, ndi kudumuwa ma unyoro ghawo.

¹⁵ Ŵawonge Ambuya chifukwa cha chanju chawo chakufikapo, chifukwa cha milimu yawo yakuziziswa pa ŵana ŵa ŵanthu!

¹⁶ Afyore pasi visasa vya mkuŵa ndi kubwanganduwa mipiringizgu ya chisulo.

¹⁷ Ŵanyake ŵangutama chifukwa cha mauheni ghawo, ndi chifukwa cha kwananga kwawo ŵangusunjizgika;

¹⁸ chakurgha chose chinguŵawukuzga, ndipo ŵangundere kufupi ku malikomo gha nyifwa.

¹⁹ Mu suzgu yawo ŵangubongole ku Ambuya, ndipo anguŵataska mu soka lawo.

²⁰ Anguŵachizga mu langulu lawo; ndi kuŵataska ku muunda.

²¹ Ŵawonge Ambuya chifukwa cha chanju chawo chakufikapo, chifukwa cha milimu yawo yakuziziswa pa ŵana ŵa ŵanthu!

²² Nadi ŵapereke sembe za kuwonga, ndi kutaula nchitu zawo mu sumu za chimwemwe.

²³ Ŵanyake ŵendanga mu nyanja mu zingaraŵa, ŵakuteŵete maumoyo mu maji ghanandi.

²⁴ Ŵanguwona vyo Ambuya achita, nchitu zawo zakuziziswa mu zindimba.

²⁵ Angulangula, ndipo mphepo yanthazi yingwamba kuputa ndi kuvunduwa mayigha.

²⁶ Ngaraŵa zingunyamukiya mude ndi kujipong'a pasi mukati mu ndimba; mu urwani nge ndi uwu, ŵanthu, ŵangumara nthazi.

²⁷ Ŵanguguŵa ndi kuzendazenda ulaka mbanthu ŵakulowe; zeru yawo yose yenga yaŵaka.

²⁸ Mu suzgu yawo ŵangubongole ku Ambuya, ndipo anguŵataska mu soka lawo.

²⁹ Anguchetamiska chimphunga, ndipo mayigha ghanguja chisisi.

³⁰ Ŵangukondwa chifukwa cha bata, anguŵafikiska umamphavi ku dowoko ko ŵangukhumba.

³¹ Ŵawonge Ambuya chifukwa cha chanju chawo chakufikapo, chifukwa cha milimu yawo yakuziziswa pa ŵana ŵa ŵanthu.

³² Ŵakonkhome ukuru wawo mu ungano wa ŵanthu, ndi kuŵarumba mu mphara ya ŵara.

³³ Asanduska misinji yiŵe chiparamba, ndi funda za maji charu chiyumu.

³⁴ Achitiska charu cha nyata kuŵa charu cha mche wakusukuruka, chifukwa cha uheni waŵakujamo.

³⁵ Asanduska bozwa mathaŵali gha maji, ndi charu chiyumu funda za maji ghakwenda.

³⁶ Ŵanja ŵati ŵajarika mwenimuwa, ndipo ŵazenga mizi yakujamo.

³⁷ Ŵangumija minda ndi kupanda mphereska, vyo vinguŵapaska vuna yakuzala.

³⁸ Angutumbika khamu lawo ndipo ŵenga ndi ŵana ŵanandi, ndipo angusunga ng'ombe zawo kuti zinguwutuka cha.

³⁹ Penipo ŵanthu ŵaku Chiuta ŵanguthereskeka ndi kuyuyulika, kukandirizgikiya pasi ndi suzgu,

⁴⁰ wangurongo kukara kwake pa ŵakuŵakandirizga, ndipo wanguŵayingiska mu bozwa lambura nthowa;

⁴¹ kweni wangupozomoska ŵakusauka mu suzgu yawo, ndi kwandaniska mbumba zawo nge ndi miskambo.

⁴² Ŵakurunjika ŵatichiwona ichi, ndipo ŵakondwa; kweni ŵaheni wose ŵachetamiskika.

⁴³ Wo wose mba zeru ŵaghaneghane ndi vinthu ivi ŵaziŵiske ndichanju chakufikapo cha Ambuya.