Sumu 106 - Tonga Bible 1986

Kutwanga kwa ŵaYisraele ndi mautaski gha Ambuya

¹ Rumbani Ambuya! Wongani Ambuya chifukwa mbamampha, chifukwa chanju chawo chakufikapo ncha muyaya!

² Njani wangakamba vya nchitu zikuru za Ambuya, njani yo wangaziŵa kuŵarumba kwakufikapo?

³ Mbakutumbikika wo ŵavwiya cheruzgu chawo, wo ŵachita cho nchakurunjika nyengo yose!

⁴ Mundikumbuke, Ambuya, po muchitiya umampha ŵanthu ŵinu; pakuŵataska, munditaskiye nawo, kumoza.

⁵ Ndiwone kusakata kwa ŵanthu ŵinu, ndi kusangana muvyamampha vya mtundu winu, mu likondwa lakujikuzga la ŵanthu ŵinu.

⁶ Mo ŵangulakwiya auskefwe, nafwe talakwa; taŵa ŵakwananga ndi ŵamphurupuru.

⁷ Po auskefwe ŵenga mu Egipiti kuti ŵanguwamo cha ndi nchitu zakuziziswa zaku Chiuta; ŵanguruwa unandi wa zinyengo zo wanguŵarongo chanju chake, ndipo ŵangumugarukiya ŵanthazi zose pa Nyanja Yiyera.

⁸ Kweni ndipuuli wanguŵataska, nge ndimo wangupanganirana, mwakuti waŵarongo nthazi yake yikuru.

⁹ Wanguchenya Nyanja Yiyera, ndipo yingukamuka, wangurongozga khamu lake, ŵangwambuka ulaka mpha mtunda uyumu.

¹⁰ Wanguŵataska ku ŵakuŵatinkha; wanguŵapozomoska ku ŵakupindikana ŵawo.

¹¹ Maji ghangubizga ŵarwani ŵawo; pengavi nanga njumoza waku wo wangusiyika.

¹² Sono ŵanthu ŵake ŵangugomekezga mu mazu ghake; ndipo ŵangumumbiya marumbu.

¹³ Kweni ruŵi ŵanguruwa vyo ŵanguchita, kuti ŵangulinda urongozgi wake cha.

¹⁴ Ŵanguzazika ndi chirghoko mu bozwa, ndipo ŵangwesa Chiuta.

¹⁵ Wangutuma nthenda yakofya mukati mwa wo, viyo wanguŵapaska cho iwo ŵangupempha.

¹⁶ Mu ugoŵi ŵanguchita sanji ndi Mosese, pamoza ndi Aroni, ŵakupaturika ŵa Ambuya,

¹⁷ Viyo charu chingujurika ndi kumeza Datani, chinguwundiya Abiramu ndi mbumba yake;

¹⁸ moto ungusikiya pa mpingu wawo ndipo ungocha ŵanthu ŵaheni ŵa.

¹⁹ Ŵanguchita tholi la golide mu Horebe, ŵangusopa chikozgo ichi.

²⁰ Ŵangusopa chikozgo cha nyama ya kurgha uteka mu malo ghakusopa Chiuta.

²¹ Ŵanguruwa Chiuta mtaski wawo yo wanguchita vikuru mu Egipiti,

²² nchitu zakuziziswa mu charu cha Hamu, vinthu vyakofya pa Nyanja Yiyera.

²³ Ndi viyo Chiuta wanguti wakaparghang'anga ŵanthu ŵake; kweni Mosese, mteŵeti wake wakusankhika, wanguma pakati paku Chiuta ndi ŵanthu, kuwezga ukari wake ku kuŵananga.

²⁴ Sono ŵanguchipata charu chakunozga, chifukwa ŵengavi kugomekezga mu phanganu laku Chiuta.

²⁵ Ŵanguja mu mahema ghawo ndi kudinginika, ndipo kuti ŵanguvwiya mazu gha Ambuya cha.

²⁶ Mu chifukwa cho anguŵarapiya rapu kuti akaŵabayiyanga mu bozwa,

²⁷ ndi kumbininiskiya mphapu yawo mu mitundu, alinga kuti ŵakafwiye mu vyaru vya chilendo.

²⁸ Ndipo ŵanthu ŵaku Chiuta ŵangujibatika ku kusopa Bala pa Peori, ndi ŵangurgha sembe zakupaskika ku ŵakufwa.

²⁹ Ndi nchitu zawo ŵanguyuska ukari wa Ambuya, ndipo nthenda yakofya yingubuka mukati mwawo.

³⁰ Penipo Finehasi wanguma ndi wanguŵeyere, ndipo chideru chinguleka.

³¹ Ichi chikumupimikiya nge mburunji, ku migonezi yose muyaya.

³² Pa visima vyaku Meriba ŵanthu ŵa Ambuya ŵanguŵakaripiska so, ndipo Mosese wenga musuzgu pa chifukwa chawo.

³³ Ŵangumukaripiska ukongwa Mosese, mwakuti wangurongoro vinthu vyo wengavi kwenere kuvirongoro.

³⁴ Kuti wangupasuwa mafuku gha ŵanthu cha, nge ndimo Ambuya anguŵalanguliya,

³⁵ kweni ŵangwendezgana ndi ŵamitundu ndi kusambira nthowa zawo ziheni.

³⁶ Ŵanthu ŵaku Chiuta ŵangusopa ŵangoza, ndipo ichi chinguŵatore pharghaniko,

³⁷ Ŵangupereka ŵana ŵawo ŵanthurumi ndi ŵanthukazi, kuŵa sembe ku ŵachiuta ŵangoza.

³⁸ Ŵangudiska ndopa zambura kafukwa, ndopa za ŵana ŵawo ŵanthurumi ndi ŵanthukazi, kuŵa sembe ku ŵangoza ŵaku Kanani; viyo charu chingukazuzgika ndi ndopa.

³⁹ Ŵangujikazuzga ndimachitiru ghawo, ndipo kwaku Chiuta ŵenga ŵambura magomezgeka.

⁴⁰ Viyo Ambuya angukara ndi khamu lawo, angukwiyiskika nawo;

⁴¹ anguŵapereka ku janja la ŵamitundu mwakuti wo ŵanguŵatinkha ndiwo ŵanguŵausa.

⁴² Ŵakupindikana ŵawo ŵanguŵakandirizga, ndipo ŵanguthereskeke pasi pa mazaza ghawo.

⁴³ Panandi anguŵapozomoska, kweni ŵenga ŵachigaruka mu nchitu zawo, ndipo ŵangusiskikiya pasi chifukwa cha uheni wawo.

⁴⁴ Ndipuuli po ŵanguliriya ku Ambuya anguŵavwa, angughanaghana ndi suzgu yawo.

⁴⁵ Ndipo pakuŵaphwere angukumbuka phanganu lawo, ndi pa chifukwa cha chanju chawo chikuru anguŵagowoke.

⁴⁶ Angupaska mtima wa chitima kwaku wo ŵanguwako umkoli.

⁴⁷ Titaskeni, Ambuya Chiuta widu, ndipo mutituzgemo mukati mu mitundu, alinga kuti tirumbe zina lakupaturika, ndikwangara pa kumuwongani imwe.

⁴⁸ Atumbikike Ambuya, Chiuta waku Yisraele, kutuwa ku muyaya mpaka ku muyaya! Ndipo ŵanthu wose ŵakambe, “Ameni!” Rumbani Ambuya!