Sumu 105 - Tonga Bible 1986

Vyakuziziswa vyo Ambuya achitiya Yisraele

¹ Wongani Ambuya, taulani ukuru wawo ziŵiskani mu mtindu nchitu zawo.

² Mbiyani iwo akoŵeriyeni marumbu; kambani vya nchitu zawo zose zakuziziswa zo atata!

³ Kondwani pakuti ifwe te ŵawo; yangarenge mitima yaku wose ŵakupenja Ambuya!

⁴ Penjani Ambuya ndi nthazi yawo, penjani chisku chawo nyengo yose!

⁵ Kumbukani milimu yawo yakuziziswa yo achita, vya minthondwi yawo, ndi vyeruzgu vyo akamba.

⁶ Mwa ŵamphapu yaku Abrahamu mteŵeti wawo, mwa wana waku Yakobe, mwa ŵakusankhika ŵawo! Mwa ŵana ŵaku Yakobe, mwa ŵakusankhika ŵawo!

⁷ Ndiwo Ambuya, Chiuta widu; vyeruzgu vyake vya charu chose chapasi.

⁸ Wakasunganga dangu lake muyaya, mapanganu ghake ku migonezi chikwi (1,000).

⁹ Phanganu lo wangupangana ndi Abrahamu, ndi rapu lake kwaku Yisaki,

¹⁰ lo wangulikhozga kwaku Yakobe nge ndi langulu, kwaku Yisraele nge ndi phanganu la muyaya,

¹¹ kuti, “Ndikupaskenge charu cha Kanani; chikaŵanga chihara chako.”

¹² Ŵanthu ŵaku Chiuta ŵenga ŵakurengeka ŵaka, ndipo ŵenga ŵalendo mu charu.

¹³ Ŵanguyingayinga kutuwa mu charu ichi kuya mu charu chiya, kutuwa mu ufumu uwu kuya mu ufumu uwa;

¹⁴ kweni kuti wanguzomerezga nanga njumoza kuŵakandirigzga cha, ndipo wanguchenya ŵakaronga pa chifukwa chawo.

¹⁵ Wanguti, “Rekani kukwaska ŵateŵeti ŵangu ŵakusankhika; ŵamchimi ŵangu mungaŵachitiyanga uheni cha!”

¹⁶ Penipo Ambuya angutuma chilala mu charu chawo, ndi kutuzgamo kurchga kwawo kose,

¹⁷ angudanjizga Yosefe paurongo pawo, mweniyo wangugulika nge ndi muŵanda.

¹⁸ Marundi ghake ghangutemeka chifukwa chakumangika ndi matangaja, ndipo gori la chisulo linguŵikika pa khosi lake.

¹⁹ Mpaka penipo chingufiskika cho angulangula, mazu gha Ambuya ghangumusimikizgiya uneneska.

²⁰ Sono karonga wa Egipiti wangumufwatuwa; wakuwusa wa mitundu wangumtuzga mwanangwa.

²¹ Wangumuŵika kuŵa wakurongozga boma lake, ndi kuŵa wakuwusa charu chose.

²² Wakuŵa ndi mazaza ghakuru pa zinduna za karonga, wanthazi kusambizga ŵapangizgi ŵake ŵa zifundu.

²³ Pavuli Yakobe wanguruta ku Egipiti, ndipo wanguja mu charu chenichiya.

²⁴ Ambuya angwandaniska ukongwa khamu lawo, ndipo anguŵakhomeska kwakuruska ŵarwani ŵawo.

²⁵ Anguchitiska ŵaEgipiti ŵatinkhenge ŵanthu ŵawo, ndi kuchitiya ukazuzi ŵateŵeti ŵawo.

²⁶ Ndipo angutuma mteŵeti wawo Mosese, ndi Aroni, wo angusankha.

²⁷ Ŵanguchita nchitu zikuru zaku Chiuta, ndi munthondwi mu Egipiti.

²⁸ Wangutuma mdima pa charu, kweni ŵaEgipiti kuti ŵanguvwiya dangu lake cha.

²⁹ Wangung'anamuwa maji ghawo kuŵa ndopa, wangubaya somba zawo zose.

³⁰ Charu chawo chinguzazika ndi ŵachuwa, inya, nanga ndi mu nyumba ya karonga.

³¹ Po Ambuya angulangula, nyezi ndi sabwe vinguzaza charu chose.

³² Mu malo mwa kutuma vuwa angutuma fukunyila ndi malimphezi pa charu chawo.

³³ Angunanga mphereska zawo ndi miti ya mkuyu, miti angufyore pasi.

³⁴ Angukamba, ndipo kunguza ŵazombe, kambundi wenga vikwi vyambura maŵerengeka;

³⁵ ŵangurgha vyakume vyose mu charu; ŵangurgha mbutu yose.

³⁶ Angubaya wose ŵana ŵa umwali mu mbumba zose mu Egipiti.

³⁷ Penipo angutuzga ŵaYisraele, ŵangupinga siliva ndi golide, ndipo wose ŵenga ŵa umoyo wamampha ndi ŵanthazi.

³⁸ Ŵachituwa iwo Egipiti wangukondwa, chifukwa ŵanguchita nawo mantha.

³⁹ Angutandika bingu kuŵa chivwinkhu, ndi moto wakuŵapaska ukweru ndi usiku.

⁴⁰ Ŵangufumba, anguŵapaska tumbuŵi, anguŵapaska kurgha kutuwa kuchanya, kuŵagutiska.

⁴¹ Angujura jarawi, maji ghangupunguka, ghangwenda nge ndi msinji mu bozwa.

⁴² Angukumbuka phanganu lawo lakupaturika kwaku Abrahamu mteŵeti wawo.

⁴³ Viyo angutuzga khamu lawo ndi chimwemwe, ŵanthu ŵawo ŵakusankhika ndi kusekere kukuru.

⁴⁴ Anguŵapaska vyaru vya ŵalendo, anguŵazomerezga kuto minda yawo,

⁴⁵ mwakuti ŵanthu ŵawo ŵavwiye malangulu ghawo, ndi kusunga marangu ghawo. Rumbanga Ambuya!