Sumu 104 - Tonga Bible 1986Ambuya aphwere vyakulengeka vyawo vyose 1 Rumbanga Ambuya, wa mzimu wangu! Ambuya, Chiuta wangu, mwe ŵara ukongwa! Mukuvwarikika ulemu ndi unkhankhu; 2 mwajivwinkha ndi kungweruka nge ndi raya, mwatandika machanya nge ndi hema. 3 Mwazenga muzi winu pachanya pa maji, wakusanduska mabingu gareta lake, ndi kwenda pa mapapa gha mphepo. 4 Muchitiska zimphepo nge ndi mathenga ghinu, kumwetuka kwa limphezi nge mbateŵeti ŵinu. 5 Mwajariska charu pa viŵanja vyake, mwakuti chireke kusukunika muyaya. 6 Mwachikukiska ndi nyanja ulaka ndi khanju, ndipo maji ghanguburumutizga mapiri. 7 Kweni po imwe munguchenya maji ghanguthaŵa; penipo ghanguvwa kukambura kwinu kwa kulangula, ghanguŵiriŵitiya kutali. 8 Ghangukwere mu mapiri ghangusikiya mu vidika, ku malo gho mungughajarikapo. 9 Mungughaŵikiya mphaka kuti ghareke kujumpha, alinga kuti ghareke kuburumutizga so charu chapasi. 10 Mubwibwituska maji mu madambo, ghatenda mukati mu mitunthu. 11 Vipaska maji ku nyama za mudondo; ŵabori ŵazimwizga nyota yawo. 12 Tuyuni tuzenga vivimbu vyawo mu miti yo ye pafupi ndi tutumba. 13 Mung'iska vuwa pa mapiri kutuwa kuchanya, ndipo charu chazaza ndi vitumbiku vinu. 14 Mumezge ng'ombe uteka, ndi mbutu kuti munthu waziphwere, viyo waronde vyakurgha mu charu. 15 Wapanga vinyo kuti wakondweskenge mtima wake, mafuta kuŵaliska chisku chake, ndi kurgha kwakumupaska nthazi. 16 Milanji yaku Lebanoni yironde vuwa yinandi, miti ya Ambuya, yo iwo angupanda. 17 Viyuni vizenga vivimbu vyawo mwenimuwa; tofu nayo wendi nyumba yake mwenimo. 18 Mbaŵa zija mu mapiri ghatali, ndipo mbira zibisama mu majarawe. 19 Mukulenga mwezi kurongo zinyengo; dazi liziŵa kusere kwake. 20 Imwe mukwata usiku, ndipo mu mdima vinyama vyose vya mu dondo vituwa. 21 Nkharamu za mpupuka zikoroma uku ziŵinga, kupenja kurgha ko Chiuta watizipaska. 22 Asani lumwi latuwa ziwere vuli, kwachigona pasi mu mphanji zawo. 23 Sono ŵanthu ŵatuliya ku nchitu zawo, ŵatakataka mpaka mazulo. 24 Ambuya, mwachita vinthu vinandi ukongwa! Ndi zeru yinu mwachita ivi vyose! Charu chapasi chazaza ndi vyose imwe mwalenga. 25 Nyanja ndi yiya, yikuru ndi yisani, mwenimo vilengiwa vyambura maŵerengeka vija, vikuru ndi vimana viyo. 26 Ngaraŵa zitenda mwenimo, ndipo njoka ya mu nyanja yo mukulenga yiseŵe mwenimo. 27 Vyose ivi vithamiya imwe, kuvipaska kurgha pa nyengo zake. 28 Mutivipaska ndipo vironda, mutivinozge kurgha, ndipo viturgha viguta. 29 Asani mwabisa chisku chinu, vichita mantha; ndipo asani mwatuzgako mvuchi winu, vitufwa; ndi kuwere ku dongo ko vingutuliya. 30 Kweni asani mwavipaska mvuchi, vituŵa ndi umoyo; mupaska umoyo ufya ku charu. 31 Unkhankhu wa Ambuya ujaririyenge muyaya! Ambuya akondwenge mwaku vyo atata! 32 Iwo alereska pa charu chapasi, ndipo chitenthema; achikwaska mapiri, ghasunkha usi. 33 Ndimbiyenge Ambuya ndichiŵa wamoyo; ndikoŵeriyenge marumbu kwaku Chiuta wangu mu umoyo wangu wose. 34 Mphanyi Ambuya akondwa ndi sumu yangu, chifukwa atindikondweska. 35 Ŵaheni ŵaparghang'ike mu charu chapasi; ŵakulakwa kuti ŵaŵemo so cha! Rumbanga Ambuya wa mzimu wangu! Rumbanga Ambuya! |
Bible Society of Malawi
Bible Society of Malawi