Sumu 103 - Tonga Bible 1986

Marumbu gha vyawezi vya Ambuya

Sumu yaku Davidi

¹ Rumbanga Ambuya, wa mzimu wangu, ndipo chose cha mukati mwangu, chirumbe zina lawo lakupaturika!

² Rumbanga Ambuya, wa mzimu wangu, ndipo ungaruwanga vyakovya vyawo vyose.

³ Mbakugowoke kubende kwako kose, mbakuchizga nthenda zako zose.

⁴ Akuwombo umoyo wako ku zenje, wo atikuvwarika ndi chanju chakufikapo ndilisungu.

⁵ Wo atikugutiska vyamampha mu umoyo wako wose, reka unyamata wako uweremo nge ndi nombo.

⁶ Ambuya achita urunji ndi cheruzgu paku wose ŵakukandirizgika.

⁷ Anguziŵiska nthowa zawo kwaku Mosese, nchitu zawo ku ŵaYisraele.

⁸ Mba chitima ndi ŵawezi Ambuya, mba chizita mu kukaripa, kweni mbakuzala ndi chanju chakufikapo.

⁹ Kuti akachenyanga nyengo yose cha, nanga nkhusunga kandundu kawo muyaya.

¹⁰ Kuti atichitiya kwakuyana ndi uheni widu cha, pamwenga kutiwerezgiyapo kwakuyana ndi vyakulakwa vidu.

¹¹ Mo kuchanya kuliri ndi charu chapasi, ndimo chifundu chawo chiliri ukuru paku wose ŵakuŵawopa;

¹² nge ndimo kuvuma kuŵiya kutali ndi kuzambwe viyo ndimo anderezge kutali kwaku ifwe mphurupuru zidu.

¹³ Nge ndimo liliri lisungu la wiske pa ŵana ŵake, ndimo Ambuya achitiya lisungu pa ŵakuŵawopa.

¹⁴ Chifukwa aziŵa mo tikulengeke; akumbuka kuti te fuvu ifwe.

¹⁵ Kwakulingana ndi munthu, mazuŵa ghake ghe nge mbuteka; watipitiya ulaka ndi luŵa lamu dondo.

¹⁶ Po mphepo yiputapo, ilo laruta palivi, ndipo palivi yo watiliwona so.

¹⁷ Kweni chifundu cha Ambuya nchakutuwa ku muyaya mpaka ku muyaya, paku ŵeniwo wose ŵati wawopa, ndi ukongorekwa wawo ngwa ku migonezi yose,

¹⁸ kwaku wo ŵasunga phanganu lawo, wo ŵakumbuka kuchita marangu ghawo ghose.

¹⁹ Ambuya ajarika chitengo chawo kuchanya, ndi karonga waku wose.

²⁰ Rumbani Ambuya, mose mwa ŵangelo ŵawo, mwa vilimbi vyanthazi, mwakuvwiya marangu ghawo, mwa ŵakutegherezga kwaku vyo akamba!

²¹ Tumbikani Ambuya mose mwa nkhondo zake; mwaŵakumiriya ŵake, mwaŵakuchita khumbo lake!

²² Tumbikani Ambuya mose mwa nchitu zake, mu malo ghose gha mtufu wake: Tumbika Ambuya, wa mzimu wangu.