Sumu 101 - Tonga Bible 1986

Wakumba wajinene urunji wake

Sumu yaku Davidi

¹ Ndimbiyenge vya chifundu ndi cheruzgu; kwaku imwe, Ambuya, ndimbiyenge.

² Ndikajisunganga mu nthowa yambura kalema. A, kumbi muzenge zuŵanji kwaku ine? Ndendenge ndi mtima wakutowa mu nyumba yangu;

³ kuti ndiŵikenge kanthu kaheni paurongo pa maso ghangu cha. Nditinkha nchitu zaku wo ŵapatukako kwaku Chiuta; kuti ndibatikanenge nawo nanga nkhamana cha.

⁴ Mtima wa mamphuru utuwengeko kwangu; uheni kuti ndikaziŵananga nawo cha.

⁵ Ndikaphwanyanga munthu mweniyo warongorore uheni pa muanasi wake ku ubende. Munthu wa maso ghakujitunthwa ndi mtima wa kujikuzga kuti ndimulekerezgenge waka cha.

⁶ Ndizomerezganenge nawo wo mbakugomezgeka kwaku Chiuta, ndipo ŵakajanga mu nyumba yangu ya ufumu; wo ŵatenda mu nthowa yakurunjika ndiwo ŵakazomerezgekanga kunditeŵete.

⁷ Wakukambautesi yose kuti wakajanga mu nyumba yangu cha, mupusikizgi yose kuti wakajanga pa maso pangu cha.

⁸ Zuŵa ndi zuŵa ndiparghang'enge ŵaheni wose mu charu chidu, ndiŵadikenge wose ŵakwananga mu msumba waku Chiuta.