Sumu 10 - Tonga Bible 1986

Kurombe kugodeka kwa ŵaheni

¹ Ambuya mwamiyanji patali? Mwabisamiyanji mu nyengo za suzgu?

² Mukujikuzga kwawo ŵaheni ŵasuzga ŵakavu; ŵakoreke mu vyakwata vyo ŵaghanaghana.

³ Pakuti muheni watijikuzga mu makhumbo gha mtima wake, ndipo munthu wa mbunu ndi chanduwu wanyoza ndi kutuka Ambuya.

⁴ Mukujikuzga kwake munthu muheni watiti, “Chiuta kuti wakandilanganga cha, kuti waphwereko cha!” Agha ndigho maghanaghano gha munthu muheni.

⁵ Nyengo zose nthowa zake zisakata; vyeruzgu vinu vye pachanya, patali ndi iyo; ŵarwani ŵake wose, wati ŵanyoza.

⁶ Watiti mu mtima wake, “Kuti ndisukuniskikenge cha; ku migonezi yose kuti ndikasaniyanga soka cha.”

⁷ Mlomo wake ngwakuzaza kutemba, kupusika, ndi kunyenga; pasi pa lilime lake pe soka ndi utimbanizi.

⁸ Waja mwakubisama mu mizi; mu malo ghakubisamamo wabaya ŵamburakafukwa.

⁹ Wabisama ndi kukhazgha kuko nge ndi nkharumu mu malo ghake, wapenja ŵasauchi, kuŵakore mu chiŵana chake.

¹⁰ Wakusauka wapumika wakandirizgikiya pasi, ndi kuwiyapo ndi nthazi yake.

¹¹ Mu mtima wake watiti, “Chiuta waruwa, wabisa chisku chake, kuti wakachilereskanga so cha.”

¹² Sokani, Ambuya; Chiuta mwe, soskani janja linu; mungaruwa wakusuzgika.

¹³ Chifukwa chine muheni wanyoza Chiuta, ndipo watiti mu mtima wake, “Imwe kuti mukachifumbanga cha?”

¹⁴ Imwe mwawona; inya, mwapanikizga suzgu ndi chigwinini, mwakuti muvitore mu manja ghinu; wakusauka watijipereka kwaku imwe; imwe mwaŵa movya wa ŵaranda.

¹⁵ Fyoni janja la muheni ndi wakuchita utimbanizi; penjani uheni wake mpaka po mwasaniya kuti palivi.

¹⁶ Chiuta ndi karonga ku muyaya ndi muyaya; ŵamitundu ŵakaparghang'ikanga mu charu chake.

¹⁷ Ambuya, imwe mukavwanga khumbo la ŵakuzika; mukakhozganga mitima yawo, mutegherezgenge gutu linu,

¹⁸ mwakuti mweruzgi umampha muranda ndi wakuphwatikiya pasi. Ndikuti munthu wa charu chapasi wareke kuŵa so wakofya.