Sumu 1 - Tonga Bible 1986

BUKU 1 ( Sumu 1—41 ) Kusiyana kwa ŵamampha ndi ŵaheni

¹ Wakutumbikika ndi munthu yo kuti watenda mu fundu ya ŵaheni cha, ndi mu nthowa ya ŵakunanga kuti watuma cha, nanga ndimukuteka kwa ŵakuyeya kuti wajamo cha.

² Kweni mu dangu la Ambuya ndimo mwe likondwa lake; ndipo mu dangu lawo ndimo warunguruka msana ndi usiku.

³ Wakozgana ndi muti wakupandika pa mphepete pa misisi ya maji, weniwo upasa vipasi vyake mu nyengo yake, jani lake kuti lifota cha; mwaku chose cho wachita, wasakata.

⁴ Waheni kuti ŵe viyo cha, kweni ŵe nge ndi mwere wo mphepo yiputiska.

⁵ Viyo ŵaheni kuti ŵasokenge cha mu kweruzga, nanga mbakunanga mu mpingu wa ŵakurunjika;

⁶ pakuti Ambuya aziŵa nthowa ya ŵakurunjika kweni nthowa ya ŵaheni yisoŵenge.