Ruti 3 - Tonga Bible 1986

Chenjezgu Laku Naomi Kwaku Ruti

¹ Viyo Naomi mpongozi wake wanguti kwaku iyo, “Wa mwana wangu si nditenere kukupenje nyumba alinga kukuŵiyenge umampha?

² Kumbi Boazi si ndi mbali widu, mweniyo ŵamwali ŵake ŵenga nawe pamoza? Awona wapepeta barile ndi usiku pa mubuli.

³ Usambe ndi ujipake mafuta ndipo uvwali vivwalo vyako vyamampha ndi uruti ku mbuli; kweni kwachijiziŵiska kwaku yo cha; mpaka penipo wamara kurgha ndi kumwa.

⁴ Kweni asani wala pasi, ughateske malo gho walapo, pavuli ukarute ndi kuvunuwa marundi ghake ndi ukagone pasi, ndipo wamkukunene cho wamuchita.”

⁵ Ndipo wangwamuka, “Vyose vyo mukamba ndikachitanga.”

⁶ Viyo wanguruta ku mbuli, ndi wanguchita uli ndimo mpongozi wake wangumpangizgiya.

⁷ Ndipo penipo Boazi wangurgha ndi wangumwa, ndi mtima wake ungusangaruka, wanguruta kwa chila pa umari wa ndundu ya barile. Sono Ruti wanguza kwakunyanyata ndi wanguvunuwa marundi ghake ndi wangula pasi.

⁸ Ndi usiku pakati Boazi wanguchuruka ndi wangung'anamuka, ndi wanguwona kuti munthukazi wangula pa marundi ghake!

⁹ Iyo wanguti, “Ndiwe yani?” Ndipo munthukazi wangwamuka kuti, “Ndine Ruti, mteŵeti munthukazi wako; vwikha chiketi chako pa mteŵeti munthukazi wako pakuti we muhari.”

¹⁰ Wanguti, “Ambuya akutumbike mwana wangu; wezi wakumariya uwu wachita ngukuru kuruska wakudanga mwakuti wapenja ŵanyamata cha, manyi mbasauchi manyi mbasambasi.

¹¹ Ndipo sono, wa mwana wanguungopanga cha ndikakuchitiyanga chose cho upempha, pakuti ŵanyangu wose ŵamu msumba ŵaziŵa kuti we munthukazi wakuzirwa.

¹² Ndipo mbuneneska kuti ine nde muhari; kweni walipo munyake muhari ukongwa kuruska ine.

¹³ Uje panu usiku uno asani ndi mlenji wakakuharanga kuŵa muwoli wake, nchamampha mureke wakuhari kweni asani kuti wakakhumbanga cha kukuhara, po ndipo uli ndimo Ambuya ajaliya amoyo, ine ndikakuchitiyanga cho muhari watenere kuchita. Ugone pasi mpaka ndi mlenji.”

¹⁴ Viyo wangula pa marundi ghake mpaka mlenji; kweni wanguyuka ndi chivivivi penipo ŵanthu kuti ŵanguziŵana cha yumoza ndi munyake. Ndipo Boazi wanguti, “Kureke kuziŵika kuti munthukazi wanguza ku mbuli.”

¹⁵ Ndipo wanguti, “Iza nayo saru yo wavwala ndi uyidandawuwe.” Viyo Ruti wanguyidandawuwa, ndi Boazi wangupima mweso yinkhonde ndi umoza ya barile wangumupingizga; pavuli Ruti wanguruta mu msumba.

¹⁶ Ndipo wanguti waza ku mpongozi wake wanguti, “Wachenda uli wa mwana wangu?” Sono wangumunene vyose vyo munthu yuwa wangumuchitiya,

¹⁷ kuti, “Myeso iyi yinkhonde ndi umoza ya barile wangundipaska ndiyo, pakuti wanguti, ‘Ungawere ku mpongozi wako ndi manja ghawaka cha.’ ”

¹⁸ Iyo wangwamuka, “Ulindizge, wa mwana wangu mpaka penipo waziŵa mo ghaŵiyenge makani pakuti yo munthu wakapumuwanga cha, kweni wakaghamalizganga makani gho msana wale.”