Nthanthi 9 - Tonga Bible 1986

Madghera gha zeru

¹ Zeru zazenga nyumba yake, zamika nchindamilu zake nkhonde ndi ziŵi.

² Wabaya ng'ombe zake, wapanga vinyo wake, ndi wanozga gome lake.

³ Zatuma ŵamwali ŵake kwa chidanirizga mu malo ghakukwera mu muzi,

⁴ “Yo ngwambura zeru, wapatukiye kuno!” Kwaku yo ngwambura vinjeru, watiti,

⁵ “Zanga, uzirghepo chiŵande changu, ndi kumwapo vinyo yo ndatimphulingang'a.

⁶ Ureke uzereza, ndi uŵe wamoyo, ndipo wendenge mu nthowa ya vinjero.”

⁷ Mweniyo wasuska wakuyeya watijipaska kutukana, ndipo mweniyo wachenya munthu wa mphulupulu waŵikapo kupoteka.

⁸ Reka kuchenya ŵakuyeya, vinu ŵangakutinkha; chenya munthu wa zeru, ndipo wakakwanjanga.

⁹ Runguchizga munthu wa zeru, ndipo wakaŵanga wa zeru kwakuruska; sambizga munthu wakurunjika ndipo wakuwenge mukusambira.

¹⁰ Kopa Ambuya nkhwamba kwa zeru, ndi chinjeru cha Mtuŵa Yumoza yo ncha mukati.

¹¹ Pakuti mwaku ine mazuŵa ghako ghakandananga, ndipo virimika vikasazgikiyangako ku umoyo wako.

¹² Asani we wazeru, we wazeru kwaku wamweni; asani uyeya, wamweni wija ukakomwanga.

¹³ Munthukazi wakupusa ngwa chiwawa, walivi fundu ndipo kuti waziŵa soni cha.

¹⁴ Waja pa khomo la nyumba yake, waja pa mupando mu malo gha pachanya ghamu msumba,

¹⁵ kudana ŵeniwo ŵadumuwapo, ŵeniwo ŵadunjika kweniko ŵatiya,

¹⁶ “Yose yo ngwakuyeyeka mu maso, wapatukiye kuno!” Ndipo kwaku mweniyo ngwambura chinjeru,

¹⁷ “Maji ghakumwa ghasamuka, ndipo chiŵande chakurghiya mu uchenjezi chikondweska.”

¹⁸ Kweni iyo kuti waziŵa cha kuti ŵakufwa ŵe mwenimuwa, kuti ŵalendo ŵake ŵemu ndimba za muunda.