Nthanthi 8 - Tonga Bible 1986

Zeru yiruska mukachitidu kake

¹ Kumbi kuti zeru yidana cha, kumbi kuwamo kuti kukambura mazu ghake cha?

² Pachanya pa mitunthu pafupi ndi nthowa, mu miseu kutuma mwenimo;

³ pachiri pa malikomo ku maso kwa msumba, pakuserere pa makhomo ghakuru kuliya kwakubangura:

⁴ “Ndidana kwaku imwe mwaŵanthurumi mwe ndipo kuliya kwangu nkhwaku ŵana ŵanthurumi ŵa ŵanthu.

⁵ Mwaŵampupuka sambirani kuphwere, mwaŵanthurumi ŵakupusa ŵikanipo mtima.

⁶ Avwani, pakuti ndikakambanga vyakuzirwa, ndipo ku mlomo kwangu kukatuwanga cho nchakurunjika;

⁷ pakuti mlomo ukatuzganga uneneska; mphurupuru mbukazuzi ku milomo yangu.

⁸ Mazu ghose gha mlomo wangu ngarunji; palivi chakunyongoloska pamwenga chakunyongoloka mwaku gho.

⁹ Ghose ngakunyoroka kwaku mweniyo wawamo ndipo ngamampha kwaku wo ŵasaniya zeru.

¹⁰ Toni kusambizga kwangu mu malo gha siliva, ndi zeru kwakuruska golide lakusankhika;

¹¹ pakuti zeru njamampha kwakuruska vyuma, ndipo chose chenicho mungakhumba kuti chingayana nayo cha.

¹² Ine, zeru, ndija mu kuphwere, ndipo ndisaniya chinjeru ndi kughanaghana.

¹³ Kopa Ambuya nkhutinkha uheni. Kunyada ndi kujikuzga ndi nthowa ya uheni ndi kirongoro kwakupuruska nditinkha.

¹⁴ Ndendi chipangu ndi zeru yakufikapo, ndendi kuziŵa kwa mukati, ndendi nthazi.

¹⁵ Ŵakaronga ŵawusiya mwangu, ndipo ŵeruzgi ŵateruzga kwakurunjika;

¹⁶ ŵana ŵa mafumu ŵawusiya mwangu, ndipo ŵanangwa ŵateruzga charu chapasi.

¹⁷ Nditanja ŵeniwo ŵatindanja, wo ŵatindipenja kwarwana ŵatindisaniya.

¹⁸ Vyuma ndi ulemu vyendi ine, ulemelelo wakukiyakiya ndi kusakata.

¹⁹ Chipasi changu nchamampha kwakuruska golide, chingana ndi golide wakwenguwa, ndi chanduwu changu chiruska siliva wakusankhika.

²⁰ Nditenda mu nthowa ya urunji, mu miseu ya cheruzgu chirunji,

²¹ kupaska ulemelelo kwaku ŵeniwo ŵatindanja, ndi kuzaza mbiku zawo.

²² Ambuya ŵangundilenga pa mtendeko wa mlimu wawo, mlimu wawo wanchitu zawo za mwaka.

²³ Mu migonezi ya kale ndingumikika, pakudanga, chenga chindayambe charu chapasi.

²⁴ Kuchalivi zindimba ndingusotopoleka, penipo, kwengavi visima vyakuŵa ndi maji.

²⁵ Mapiri ghenga ghandarongosoleke, paurongo pa mutunthu, ndingusotopoleka;

²⁶ ŵenga andalenge charu chapasi ndi lisuwa lake, pamwenga fuvu lakudanga la charu.

²⁷ Penipo angujalika machanya, ine ndenga penipo, penipo angulemba chakuzunguliya pa chisku chandimba,

²⁸ penipo angukhozga mulengalenga kuchanya, penipo angujalika visima vya ndimba,

²⁹ penipo angupereka ku nyanja malili ghake, alinga kuti maji ghareke kulengeska langulu lawo, penipo angulemba viŵanja vya charu chapasi,

³⁰ penipo ndenga pamoza nawo, uli ndi kapitawo wa nchitu; ndipo zuŵa ndi zuŵa ndenga likondwa lawo, wakukondwere paurongo pawo nyengo zose,

³¹ kukondwere mu charu chawo cho chenga ndi ŵakujamo ndi kukondwere mu ŵana ŵanthurumi ŵa ŵanthu.

³² Ndipo sono, mwa ŵana ŵangu, tegherezgani kwangu: ŵakukondwa mbeniwo ŵasunga nthowa zangu.

³³ Vwani chisambizgu ndi muŵe ŵa zeru, ndipo mungachirekanga cha.

³⁴ Wakukondwa ndi munthu mweniyo wategherezga kwangu, wakulindizga zuŵa ndi zuŵa pa malikomo ghangu, wakulindizga pafupi pa makhomo ghangu.

³⁵ Pakuti mweniyo wasaniya ine wasaniya umoyo ndipo waronde mwaŵi wakutuwa ku Ambuya;

³⁶ kweni yo wapambana nane watijipweteka mweneko, wose ŵeniwo ŵatinkha ine ŵatanja nyifwa.”