Nthanthi 5 - Tonga Bible 1986Wechenje nayo munthukazi muheni 1 Wa mwana wangu, utengherezge ku zeru zangu, ŵika gutu lako ku kuwamo kwangu; 2 alinga kuti usungenge maghanaghanu gha zeru, ndi milomo yako yivikiriyenge chinjeru. 3 Pakuti milomo ya munthukazi muyaghayagha yinthona uchi, ndipo vyo wakamba iyo viteremusi kwakuruska mafuta; 4 kweni pa umari waŵaŵa uli ndi fufuzi ya mu chimuti, wakuthwa uli ndi lipanga lakuthwa kuŵi viyo. 5 Marundi ghake ghatuya ku nyifwa, michapu yake yindondoloska nthowa yakuya ku muunda, 6 kuti watiyiphwere cha nthowa ya umoyo; nthowa zake ziyingayinga kweni iyo kuti waziŵa cha. 7 Ndipo sono, mwaŵana mwe, tegherezgani kwangu, ndipo mungatuwangako cha ku mazu gha mlomo wangu. 8 Sungani nthowa yinu kutali ndi iyo, ndipo mungayanga kufupi ku khomo la nyumba yake; 9 vinu mungapaska ulemu winu ku ŵanyake ndi virimika vinu ku ŵambura lisungu; 10 vinu ŵalendo ŵangaguta vya nthazi yinu, ndi nchitu zinu zingaya ku nyumba ya mlendo; 11 ndipo pa umari wa umoyo winu mudaghenge, penipo nyama yinu ndi luŵavu vikamaranga, 12 ndipo mukakambanga, “Bama mo ndingutinkhiya kuvwiya, ndipo mtima wangu unguyeya kuchenjezga! 13 Kuti ndingutegherezga ku mazu gha ŵasambizgi ŵangu cha pamwenga kuŵikako gutu ku wakundirunguchizga. 14 Ine ndenga pa khomo la pharghaniku likuru, mu mpingu wakuwungana pamoza.” 15 Mwaninga maji gha mu chisima chaku mwaŵene, maji ghakupopoma ghamu chisima chaku mwaŵene. 16 Asani visima vinu vyakubwibwituka vingasapatiya kunyake, tumsinje twa maji mu miseu? 17 Ghaŵe ghaku imwe mwija pe, kuŵa gha ŵalendo cha ŵeniwo ŵe pamoza namwe. 18 Chiŵe chakutumbikika chisima chinu, ndipo kondwani ndi munthukazi wa unyamata winu, 19 nyama yinthukazi yakunozga, kalulu wa manyanda. Mbonekera yake yikuzaze iwe nyengo zose ndi linkondwa, nyengo zose ukhorwe ndi chanju chake. 20 Chifukwa nchine, wa mwana wangu, chakukhorwe munthukazi muyaghayagha ndi kuvumbatiya chifuŵa cha wakunyenga? 21 Pakuti nthowa za munthu ze paurongo pa maso gha Ambuya, ndipo iwo ŵateska nthowa zake zose. 22 Mphurupuru za muheni zitumuthya ndipo wawira mu kuchita kwa uheni wake. 23 Watufwa chifukwa chakuwulavi kuvwiya dangu, ndipo chifukwa cha kupusa kwake kukuru wasoŵa. |
Bible Society of Malawi
Bible Society of Malawi