Nthanthi 31 - Tonga Bible 1986

Malangulu gha anyina ŵaku Lemueli

¹ Mazu ghaku Lemueli karonga waku Masa, ghenigho nyina wake wangumusambizga:

² Nchine, wa mwana wangu? Nchine, wa mwana wa chibali changu? Nchine, wa mwana wa marapu ghangu?

³ Ungapaskanga nthazi yako ku ŵanthukazi cha, nthowa zako kwaku ŵeniwo ŵabaya ŵakaronga,

⁴ Kuti nkhwawo cha ŵakaronga, Lemueli we, kuti nkhwa ŵakaronga chakumwa vinyo, pamwenga ŵeruzgi kunweke vyakuloŵereska,

⁵ vinu ŵangamwa ndi kuruwa cho chikupanganika, ndi kutimbanizga vyenivyo vitenere ŵakuyuzgika wose.

⁶ Paska vyakuloŵereska kwaku yo wakhasa kutayika, ndi vinyo kwaku ŵeniwo ŵemu suzgu yakuŵaŵa;

⁷ aŵa uŵamweske ŵaruwe usauchi wawo, ndi kukumbuka suzgu yawo so cha.

⁸ Juliya mlomo wako wa mbuwu, ndi vyakwenere vyaku wose ŵeniwo ŵasiyika mu uyiku.

⁹ Jura mlomo wako, weruzge kwakunyoroka, uvikiriye vyakuŵenere ŵasauchi ndi ŵakavu.

Mazu gha muwoli wazeru

¹⁰ Muwoli wamampha njani wangamusaniya? Iyo ngwakuzirwa ukongwa kwakuruska mya yakuzirwa.

¹¹ Mtima wa mrumi wake ugomekezga mwake, ndipo kuti wakasoŵanga chanduwu cha.

¹² Watimuchitiya umampha, urwani cha, mu mazuŵa ghose gha umoyo wake.

¹³ Wapenja weya wa mberere ndikatunga, ndipo watata ndi manja ghakusangaruka.

¹⁴ Wachita uli ndi ngaraŵa zaŵamalonda, watuza ndi kurgha kwake kutuwa kutali.

¹⁵ Wayuka kweche mdima ndipo warongosole kurgha ŵamu nyumba yake, ndi kugaŵiya zinchitu ŵa mwali ŵake.

¹⁶ Waghanaghana za munda ndipo watiugula; ndi vipasi vya manja ghake wapanda munda wa mphereska.

¹⁷ Wamanga chiunu chake ndi nthazi ndipo walimbiska manja ghake.

¹⁸ Wawona kuti malonda ghake ghatanduwa, nyali yake kuti yizimwa cha ndi usiku.

¹⁹ Waŵika janja lake ku kamuti kakukoroŵekapo thonje lakuwombe saru, ndipo janja lake liko kakuzingiya.

²⁰ Watambaruliya janja lake kuŵakavu, ndipo wafiska manja ghake ku ŵasauchi.

²¹ Kuti watopa matalala cha chifukwa cha ŵamunyumba yake, pakuti ŵamu nyumba yake wose ŵavwalikika vyakuti je;

²² Watijichitiya vyakuvwinkha; saru zake ze ndi mtundu wamampha, ndi zakuti tuu.

²³ Mrumi wake waziŵikwa mu malikomo, wachija mukati mu ŵaraŵara ŵa charu.

²⁴ Munthukazi wachita vivwaru vya katunga ndipo waguliska, wapaska malikwamba ku ŵamalonda.

²⁵ Nthazi ndi kuzirwa ndivyo kuvwara kwake, ndipo watiyiseka nyengo yeniyo yikazanga.

²⁶ Wajura mlomo wake ndi zeru, ndipo kusambizga kwa wezi kwepa lilime lake.

²⁷ Walereska umampha ku nthowa za ŵamu nyumba yake, ndipo kuti waturgha kurgha kwa ukata cha.

²⁸ Ŵana ŵake ayuka ndipo ŵatimutamula, wakutumbikika; mrumi wake nayo wayuka ndipo iyo watimurumba:

²⁹ “Ŵanthukazi ŵanandi ŵachita umampha ukongwa, kweni iwe waŵaruska wose.”

³⁰ Mayera ghanyenga, ndipo kutowa nako nchawaka, kweni munthukazi wakopa Ambuya warumbikenge.

³¹ Umupaske iyo vya chipasi cha manja ghake, ndipo nchitu zake zimurumbe mu malikomo.