Nthanthi 3 - Tonga Bible 1986

Marangu ghakopa Chiuta, kumugomezga, ndi kumuvwiya

¹ Wa mwana wangu, ungaruwanga cha kusambizga kwangu, kweni mtima wako usungenge marangu ghangu;

² pakuti ghakakupaskanga mazuŵa ghanandi ndi virimika vinandi vya umoyo ndi unandi wa likondwa.

³ Kujithereska ndi kugomekezgeka vingakutayanga cha uvimangiliye mu khosi lako, uvilembe pa gome la mtima wako.

⁴ Po ndipo ukasaniyanga mwaŵi ndi mbiri yamampha mu maso ghaku Chiuta ndi munthu.

⁵ Gomekezga mu Ambuya ndi mtima wako wose, ndipo reka kugomezga pa chinjeru chaku wamweni.

⁶ Mu nthowa zako zose zomeranga iwo ndipo iwo ŵakanyoroskanga nthowa zako.

⁷ Ungajisanduskanga wazeru mu maso ghaku wamweni; wopanga Ambuya, ndipo utuweko ku uheni.

⁸ Ichi chikaŵanga kuchizga ku nyama yako ndi kututuvya ku viwanga vyako.

⁹ Tumbikanga Ambuya ndi chuma chako ndi vipasi vyakudanga vya vyakurgha vyako vyose;

¹⁰ po ndipo nkhokwe zako zikazazikanga ndi vyakuzala, ndipo misuku yako yikaswekanga ndi vinyo.

¹¹ Wa mwana wangu, ungayuyuwanga kendeskedu ka Ambuya pamwenga kuvuka ndi kuranga kwawo,

¹² pakuti Ambuya achenya mweniyo ŵatanja, nge ndi wiske pa mwana mwaku mweniyo wakondwere.

¹³ Wakukondwa ndi munthu mweniyo wasaniya zeru ndi yo munthu waronde kuwamo,

¹⁴ pakuti kusakata kwake kuruska kusakata kwakutuwa ku siliva; ndipo kwanduwa kwake kuruska golide.

¹⁵ Zeru zakuzirwa ukongwa kuruska mya yakuzirwa, ndipo palivi ko munganweka kangalinganizgika ndi zo.

¹⁶ Umoyo utali we ku janja lake la marghe; ku jenja la maze kwe vyuma ndi ulemu.

¹⁷ Nthowa zake ndi nthowa za kusangaluska, ndipo nthowa zake zose nchimangu.

¹⁸ Ndi muti wa umoyo kwaku ŵaniwo ŵatiwuko; ŵeniwo ŵatiukoleska ŵadanika kukondwa.

¹⁹ Ambuya ndi zeru angumika charu; ndi kuwamo angujulika machanya,

²⁰ ndi chinjeru chawo ndimba zinguwoneka, ndipo mitambo yingunthonezga dungwi pasi.

²¹ Wa mwana wangu, usunge zeru yeneko ndi kughanaghana kwamampha; vingatayananga nawe cha kuviwona,

²² ndipo vikaŵanga umoyo wa mzimu wako ndi chakunozge khosi lako.

²³ Po ndipo ukendanga mu nthowa yako wakuvikirika ndipo lundi lako kuti likaguŵanga cha.

²⁴ Asani ukajanga pasi, kuti ukawopanga cha; uchigona pasi tulo twako tukanowanga.

²⁵ Ungopanga kofya kwa mabuchibuchi pamwenga phasulu la muheni yo lichiza;

²⁶ pakuti Ambuya akaŵanga gomezgu lako ndipo akasunganga rundi lako ku kukoreka.

²⁷ Ungakaniliyanga umampha kwaku ŵeniwo utuŵayenere asani nkhwako kuwuchita.

²⁸ Ungakambanga cha ku muzengezgani wako, “Rutanga, ndipo ukazi so, mawa ndazampaska,” penipo we nacho.

²⁹ Ungamulongosoliyanga chiheni muzengezgani wako mweniyo waja pamoza nawe kwamagomezgeka.

³⁰ Ungalimbananga ndi munthu kwambura kafukwa, penipo walivi kukuchitiya kaurwani.

³¹ Reka kuchitiya sanji munthu wa ndeu ndipo ungasankhangapo nanga njimoza ya nthowa zake cha;

³² pakuti munthu wakupuruska mbukazuzi ku Ambuya, kweni ŵakunyoroka ŵemu chigomekezgu chawo.

³³ Thembu la Ambuya le pa nyumba ya muheni, kweni atumbika kuja kwa murunji.

³⁴ Ku ŵakuyeya, iyo ngwakuyeya, kweni ku ŵakujiyuyuwa walongo mwaŵi.

³⁵ Ŵazeru ŵakaharanga ulemu, kweni ŵakupusa ŵaronde chilengesku.