Nthanthi 28 - Tonga Bible 1986

Mazu ghakurongo mupambano wa vinthu

¹ Ŵamphulupulu ŵathaŵa penipo palivi mweniyo watuŵadikiska, kweni ŵarunji mbakukhwima mtima uli ndi nkharamu.

² Asani charu chituswa dangu chendi ŵeruzgi ŵanandi; kweni ndi ŵanthu ŵakuwamo ndi ŵachinjeru ukhovu wake ukakiyangakiyanga nyengo yitali.

³ Munthu mukavu mweniyo wayuzga ŵakavu ŵanyake, ndi vuwa ya kupuma yeniyo kuti yisiya kurgha cha.

⁴ Ŵeniwo ŵasiya dangu ŵarumba ŵamphulupulu, kweni ŵeniwo ŵasunga dangu ŵalimbana nawo.

⁵ Ŵanthu ŵaheni kuti ŵawamo cheruzgu chirunji cha, kweni ŵeniwo ŵapenja Ambuya ŵawamo kwakufikapo.

⁶ Wamamphaku ndi munthu mukavu mweniyo watenda mu ukongolekwa wake kwakuruska musambasi yo ngwakulandizga mu nthowa zake.

⁷ Mweniyo wasunga dangu ndi mwana wazeru, kweni wakukwatikana ndi nkharghi walengeska wiske.

⁸ Mweniyo watandaniska usambasi wake ndi kubwerekeska kwakuŵikiyapo ndi kwandaniska waunjikiya mweniyo wendi wezi ku ŵakavu.

⁹ Asani munthu watuzgako gutu lake kukuvwa dangu chingana ndi rombu lake ndi kazuzi.

¹⁰ Mweniyo walandizgiya murunji munthowa ya uheni, wakawanga muzenje la mweneko, kweni wambura kalema wakaŵanga ndi chihara chamampha.

¹¹ Munthu musambasi ngwa zeru mu jiso la mweneko, kweni munthu mukavu mweniyo wendi kuwamo wakamubowozganga.

¹² Penipo murunji wapunda, pe unkhankhu ukuru; kweni penipo wa mphulupulu wayuka ŵanthu ŵabisama,

¹³ Mweniyo wabisa mautimbanizi ghake kuti wakasakatanga cha, kweni mweniyo wazomera ndi kughareka wakarondiyanga lisungu.

¹⁴ Wakutumbikika ndi munthu mweniyo watopa Ambuya nyengo zose, kweni mweniyo wangangamiska mtima wake watuwa mu suzgu.

¹⁵ Uli ndi nkharamu yakukoroma, pamwenga biyere wakurotoka, ndimu walili mweruzgi wa mphulupulu pa ŵanthu ŵakavu.

¹⁶ Mweruzgi mweniyo walivi kuwamongwakuyuzga ndi nkhaza; kweni mweniyo watinkha chanduwu chizira urunji wandaniskenge mazuŵa ghake.

¹⁷ Asani munthu wanyekezgeka ndi ndopa za munyake waŵe wakuthaŵathaŵa mpaka nyifwa; paulevi wakumovya.

¹⁸ Mweniyo watenda muukongorekwa wakataskikanga, kweni mweniyo ngwakulandizga mu nthowa zake wakawanga mu zenje.

¹⁹ Mweniyo walima charu chake wakaŵanga ndi kurgha kunandi, kweni mweniyo wandondoloska twaŵakaŵaka wakasaukanga ukongwa.

²⁰ Munthu wamagomekezgeka wakazalanga ndi vitumbiku, kweni mweniyo watunthumiya kusambasa kuti warekenge kulangika cha.

²¹ Kulongo kweruzgiya lwandi kuti nkhwamampha cha, kweni pa kurgha kumanavi munthu wachimwiyengepo.

²² Munthu wakunweka chuma watinthimikiya usambasi; ndipo kuti waziŵa cha kuti ukavu ukamuziyanga.

²³ Mweniyo wasuska munthu wakasaniyanga mwaŵi pavuli, kuruska mweniyo wanyengele ndi lilime lake.

²⁴ Mweniyo watuba vya awiske pamwenga anyina ndi wakamba kuti, “Uku kuti nkhunanga cha,” ngwakukwatikana ndi munthu wakubwanganduwa.

²⁵ Munthu mususi wayuska ndeu, kweni mweniyo wagomekezga mu Ambuya wakasambasanga.

²⁶ Mweniyo wagomekezga mu maghanoghano gha mweneko ndi mbereŵeza, kweni mweniyo watenda mu zeru wakataskikanga.

²⁷ Mweniyo wapaska mukavu kuti wakavukenge cha, kweni mweniyo wabisa maso ghake warondenge matembu ghanandi.

²⁸ Asani wamphulupulu wayuka, ŵanthu ŵabisama, kweni asani wamara, murunji watandana.