Nthanthi 25 - Tonga Bible 1986

Nthanthi zaku Solomoni zo zinguwunjikika pa nyengo ya karonga Hezekiya

¹ Izi nazo so ndi nthanthi zaku Solomoni zenizo ŵanthu ŵaku Hezekiya karonga waku Yuda ŵangutoko.

² Mbunkhankhu waku Chiuta kubisa vinthu, kweni unkhankhu wa ŵakaronga nkhupenja kubowozga vinthu.

³ Mo kuchanya kukulengeke utali, charu chapasi ncha ndimba, viyo muwongo wa ŵakaronga ngwambura mapenjeka.

⁴ Tuzgako chifuvya ku siliva, ndipo wakusula wakaŵanga ndivisulu vya ngaraŵa;

⁵ tuzganipo wamphulupulu paurongo pa karonga, ndipo chitengo chake chikakuzgikanga mu urunji.

⁶ Reka kujiŵika kurongo pa maso pa karonga pamwenga kuma mu malo gha wapachanya;

⁷ pakuti nkhwamampha kunenereka kuti, “Kwerekuno,” kwakuruska kukupauskiya pasi mu maso gha mwana wa karonga.

⁸ Chenicho jiso lako lawona ungachitolenga mwafulumira mu bwalo, pakuti uchitengenje pa umali, penipo muzengezgani wako wachikulengeska?

⁹ Kamba mlando wako ndi muzengezgani wako mweneko ndipo reka kusumuwa chakuubende chamunyako,

¹⁰ vinu yo wakuvwenge wangakulengeska, ndipo ukari wako kuti ukamaranga cha.

¹¹ Mazu ghakukambika kwakwenere ghe uli ndi vipasi vya golide mu kuzganga kwa siliva.

¹² Uli ndi mphete ya golide pamwenga kakuzganga ka golide ndimu walili wakuchenya wazeru ku gutu lakutegherezga.

¹³ Uli nkhuzizira kwa matalala mu nyengo ya yakuvuna ndimu yilili nthumi yamagomekezgeka kwaku ŵeniwo ŵatiyituma, yiziziriska mzimu wa ambuyake.

¹⁴ Uli ndi mitambo ndi mphepo yambura vuwa, ndimu walili munthu yo watijikuzga chifukwa cha chaulera chenicho iyo kuti watichipaska cha.

¹⁵ Ndi kuzika mweruzgi wangaziŵa kuchichizgika, ndipo lilime lakolowa likaswanga mwa.

¹⁶ Asani wasaniya uchi yimwa waka wakukwana vinu ungavimbirwa nawo ndi ungaukuwa.

¹⁷ Lundi lako lipumuwenge mu nyumba ya muzengezgani wako, vinu wangavuka nawe ndi wangakutinkha.

¹⁸ Munthu mweniyo watole chisimisimi cha utese pa muzengezgani wake, we uli ndi nthonga ya nkhondo, pamwenga lipanga pamwenga muvwi wakuthwa.

¹⁹ Kugomekezga mu munthu wambura chivwanu mu nyengo ya suzgu kwe uli ndi jinu liheni pamwenga rundi lenilo literemuka.

²⁰ Mweniyo wambiya zisumu ku mtima uzituwe uli ndi mweniyo wazuwa chivwalu mu zuŵa lakuzizila ndipo uli ndi vinyo wakusasa pa chironda.

²¹ Asani wakupindikana wako wendi nja, amupaske kurgha warghe; ndipo asani wendi nyota, umupaske maji wamwe;

²² pakuti iwe ukalundanga maka ghamoto pa mutu wake, ndipo Ambuya ŵakakupaskanga mphoto.

²³ Mphepo yaku nkhonde yituza ndi vuwa, ndipo lilime lakusuza, lirereska kwa ukari.

²⁴ Nkhwamamphaku kuja pa chingodya cha nyumba pachanya kwakuruska mu nyumba yakujamo ndi munthukazi wakuŵereŵeta-ŵereŵeta.

²⁵ Uli ndi maji ghakuzizira ku mtima wa nyota ndimu ghalili makani ghamampha ghakutuliya kutali chakubwibwituka.

²⁶ Uli nchisima chakubwibwituka chakumata pamwenga chisima chakukazuzgika, ndimu walili munthu murunji mweniyo wandere nthowa paurongo pa ŵamphulupulu.

²⁷ Kuti nkhwamampha cha kurgha uchi unandi, viyo ulekenge kukamba mazu ghakurumba.

²⁸ Munthu wambura kujitinthawe uli ndi msumba wo ŵaswa ndi wajowoleka wambura malinga.