Nthanthi 21 - Tonga Bible 1986

¹ Mtima wa karonga nkhamsinji ka maji mu janja la Ambuya; ŵatiurongozge kose kweniko ŵakhumba.

² Nthowa yose ya munthu njamampha mu maso gha mweneko, kweni Ambuya ŵapima mtima.

³ Kuchita urunji ndi cheruzgu chirunji vyamarondeka ku Ambuya kwakuruska mipasku.

⁴ Maso gha kujikuzga ndi mtima wakujikuzga, nyali ya ŵaheni, ndi mphurupuru.

⁵ Maghanoghano gha wakutakataka kwakuneneska ghalongozge ku vyakuzala, kweni we yose mweniyo ngwakufulumiya wafikiya waka ku vyakusoŵa.

⁶ Kusaniya mauromba ndi lilime la utesi ndi mvuchi wakuyingayinga ndi chiŵana cha nyifwa.

⁷ Ukari wa wamphulupulu ukaŵapeyiyanga kutali, chifukwa ŵakana kuchita chenicho nchakurunjika.

⁸ Nthowa ya wakusanilika ndi mlando njakunyongoloka, kweni jalidu la murunji ndakunyoroka.

⁹ Nkhwamamphaku kuja pa chisongu pa nyumba pachanya kwakuruska kuja mu nyumba pamoza ndi munthukazi wakurongororongoro.

¹⁰ Mtima wa wamphulupulu unweka uheni; muzengezgani wake kuti wasaniya lisungu cha mu maso ghake.

¹¹ Penipo wakunyoza walangika, wauliuli watuŵa wa zeru, penipo munthu wazeru wasambizgika, watanduwa chinjeru.

¹² Murunji wateska nyumba ya wamphulupulu, wamphulupulu wapong'eka pasi kupharghaniko.

¹³ Mweniyo wajara gutu lake ku kuliya kwa mukavu nayo wakaliyanga kuwulengevi kumuvwa.

¹⁴ Chaulera cha kuubende chituzgapo ukari, ndi vinda lapa chifuŵa lituzgapo uzitu.

¹⁵ Asani cheruzgu chirunji chachitika, ndi likondwa ku ŵarunji, kweni chikalaliska ŵakuchita uheni.

¹⁶ Munthu yo wayingayinga kubwalo kwa nthowa ya kuwamo wakapumuliyanga mu mpingu wa ŵakufwa.

¹⁷ Mweniyo watanja vya kujikondweska wakaŵanga munthu mukavu; mweniyo watanja vinyo ndi mafuta kuti wakasambasanga cha.

¹⁸ Wamphulupulu ndi thumba lakuwombole murunji, ndi wambura chivwanu ngwa wakunyoroka.

¹⁹ Nkhwamamphaku kuja mu charu cha bozwa kwakuruska kuja ndi munthukazi wakuŵereŵeta-ŵareŵeta ndi wakukarariska.

²⁰ Usambasi wakuzirwa ujaliliya mo waja munthu wazeru, kweni munthu wakupusa watuwuparghang'a.

²¹ Mweniyo wandondoloska urunji ndi wezi wasaniyenge umoyo ndi ulemu.

²² Munthu wazeru wakwera pa msumba wa wanthazi ndipo wabwanganduliya pasi linga mwaku lo ŵagomekezga.

²³ Mweniyo wasunga mlomo wake ndi lilime watijisunga kubwalo ku suzgu.

²⁴ “Wakunyoza” ndi zina lawakujikuzga, munthu wakujikuzga mweniyo wachita ndi kujikuzga kwakujirumba.

²⁵ Kunweka kwa mukata kutumubaya, pakuti manja ghake ghakana kutakataka.

²⁶ Zuŵa lose wamphulupulu wakhumbira, kweni murunji wapaska ndipo kuti wanora cha.

²⁷ Ambuya ŵatinkha asani ŵanthu ŵaheni ŵatuŵapaska mipasku, weni ukongwa asani ŵatu wupereka ndi maghanaghano ghaheni.

²⁸ Kaboni mutesi wakamaranga, kweni mazu gha munthu yo watuvwa ghakajaliriyanga.

²⁹ Munthu wamphulupulu wavwara chisku chambura mantha, kweni munthu wakunyoroka wasanda nthowa zake.

³⁰ Palivi zeru, palivi kuwamo, palivi pangizgu, vyo vingawovya kumikana ndi Ambuya.

³¹ Kavalo warongosoleke zuŵa lankhondo, kweni kupunda nkhwa Ambuya.