Nthanthi 20 - Tonga Bible 1986

¹ Vinyo ngwa kunyoza, kumwa kwakuloŵereska, kubwebweteska, ndipo mweniyo walandizgika ndi kumwa ko kuti ngwazeru cha.

² Ukari wakofya wa karonga we uli nkhuwuruma kwa kamanakamana kwa nkharamu, mweniyo watimusosomole ku ukari wapereka umoyo wake.

³ Mbulemu ku munthu kutuwako ku ndeu; kweni mubereŵeza yose wakachitanga ndeu.

⁴ Mukata kuti walima pa chihanya cha, wakapenjanga pakuvuna ndipo wakaŵangavi kanthu.

⁵ Chakwatika mu muwongo wa munthu che uli ndi maji gha ndimba, kweni munthu wakuwamo wachituzgengemo.

⁶ Ŵanthu ŵanandi ŵamemeza kujithereska kwa ŵeneko, kweni munthu wamagomekezgeka njani wangabowozga?

⁷ Munthu murunji mweniyo watenda mu uneneska wake, mbakutumbikika ŵana ŵake pavuli pake!

⁸ Karonga mweniyo waja pa chitengo cha cheruzgu wateska uheni wose ndi maso ghake.

⁹ Njani wangakamba, “Ndatozga mtima wangu; nde wakuphotoka ku uheni wangu”?

¹⁰ Myeso yakupambana ndi kupima kwakupambana viŵi viyo vikozgana, mbukazuzi ku Ambuya.

¹¹ Chingana ndi mwanamumana watijiziŵiska ndi nchitu zake, manyi chenicho wachita nchakuphotoka ndi nchakurunjika.

¹² Gutu lakuvwa ndi jiso lakuwona, Ambuya akupanga viŵi viyo.

¹³ Reka kwanja tulo vinu ungaza ku ukavu; jura maso ghako ndipo ukaŵanga ndi kurgha kunandi.

¹⁴ “Nchiheni, nchiheni,” watiti wakugula; kweni watiti waruta, watijikuzga.

¹⁵ Pe golide, ndi mya yinandi ya mutengo yikuru, kweni milomo ya zeru ndi mwa wa mutengo ukongwa.

¹⁶ Toni chivwalu cha munthu pa nyengo yeniyo wajaliya ukaboni mlendo, ndipo mumuchite ndindira penipo wajaliya ukaboni mlendo.

¹⁷ Kurgha kwa kwanduliya mu urghargha kunowa ku munthu, kweni pavuli mlomo wake ukazazanga ndi sekenembe.

¹⁸ Vyakulongosoleka vichitika ndi chipangu; ndi kurongozgeka kwazeru nkhondo yichitika.

¹⁹ Yo watiti nkhuya uku nkhuya uku kwachisuza wasumuwa vya kuubende, chifukwa cho ungakwatikananga ndi mweniyo warongoro kwa ubereŵeza.

²⁰ Asani munthu watemba wiske pamwenga nyina, nyali yikazimwikanga mu munkhorwe.

²¹ Chihara chakuchitole mu ruŵi pakudanga pavuli kuti chitumbikikenge cha.

²² Ungambanga cha, “Nkhalipanga uheni”; lindizga Ambuya, ndipo akakovyanga.

²³ Myeso yakusiyana mbukazuzi ku Ambuya, ndipo vipimu vyakupusika kuti vyamampha cha.

²⁴ Michapu ya munthu yilangulika ndi Ambuya; na munthu wangawamo uli nthowa yake?

²⁵ Nchiŵana ku munthu kukamba kwakufulumiya, “Ncha kupatulika,” ndi kughanaghana pavuli pakuchita marapu ghake.

²⁶ Karonga wazeru waziŵa ŵamphulupulu, ndipo wapiska mkombelo paku wo.

²⁷ Mzimu wa munthu ndi nyali ya Ambuya, kupenja mu viŵalu vyake vyose vya mukati ukongwa.

²⁸ Kujithereska ndi ukongolekwa kusunga karonga, ndipo chitengo chake chisungika ndi urunji.

²⁹ Unkhankhu wa ŵanyamata ndi nthazi yawo, kweni kutowa kwa ŵanthu ŵakukota ndi nyivu zawo.

³⁰ Kupuma ko kuchita mabala kutozga uheni, mbumu zitozga viŵaru vya mukati ukongwa.