Nthanthi 17 - Tonga Bible 1986

¹ Chamamphaku nkhurgha kumanavi pamoza ndi chisisi, kwakuruska nyumba yakuzala vyakurgha pamoza ndi ndeu.

² Muŵanda mweniyo wachita kwa zeru wakausanga pa mwana mweniyo wachita kwachilengesku, ndipo wakasanganangapo chihara uli njumoza wa ŵana ndi ŵana.

³ Mumphika wakusungapo ngwa siliva ndipo ng'anjo nja golide, ndipo Ambuya ŵatesa mitima.

⁴ Wakuchita uheni wategherezga kumilomo ya mphulupulu; ndipo mutesi wategherezga ku lilime lakusovya.

⁵ Mweniyo wanyoza wakusauka watuka Mulengi wake; mweniyo ngwakukondwa pa soka kuti walekekenge kulangika cha.

⁶ Ŵazuku nchisoti cha ŵakukota, ndi unkhankhu wa ŵana ŵanthurumi mbauskeu.

⁷ Kurongoro kwamampha kuti kumunozge cha wakupusa; ndipo so kamanavi ndimu kulili kurongoro kwautesi ku mwana wa fumu.

⁸ Vinda yenge ndi mwa wa mayelamu maso ghaku mweniyo watiyipereka; kweniko kose watiya wasakata.

⁹ Mweniyo wagowoke kulakwa wapenja chanju, kweni mweniyo wawerezgapo chifukwa wapatuwa bwezi lake.

¹⁰ Kuchenya kusere pasi ukongwa mumunthu wakuwamo kwakuruska mbunu machumi pe chumi pa wakupusa.

¹¹ Munthu muheni wapenja chigaluka pe, ndipo muthenga mukari ŵakamutumiyanga wakumikana nayo.

¹² Mphanyi munthu wangawona chinyama cha biyere chenicho chapokeka ŵana ŵake, kwakuruska wakupusa mu kupusa kwake.

¹³ Asani munthu wawezge uheni pa umampha, uheni kuti ukatuwangako cha ku nyumba yake.

¹⁴ Kwamba kwa ndeu kwe uli nkhutuzga maji, viyo tuwapo ndeu yenga yindayambe.

¹⁵ Yo wazomerezga wa mphurupuru ndi yo wasuska wakurunjika wose ŵaŵi mbakukozgana mu ukazuzi ku Ambuya.

¹⁶ Chifukwa nchine chakuti wakupusa waŵi ndi malonda mu janja lake kugula zeru, penipo walivi maghanughanu?

¹⁷ Bwezi litanja nyengo zose, ndipo mwana munyako wakupapikiya suzgu.

¹⁸ Munthu wambura maghanoghano wapaska chikoli, ndipo watuŵa chikoli mu maso gha muzengezgani wake.

¹⁹ Mweniyo watanja kusovya watanja ndeu; mweniyo wachita khomo lake kuŵa litali wapenja phasulo.

²⁰ Munthu wa maghanughanu gha kubende kuti wasakata cha, ndipo mweniyo wendi lilime lakulandizga watuŵa mu suzgu.

²¹ Mwana wakupusa wapaska chitima awiske; ndipo wiske wa wakupusa walivi likondwa.

²² Mtima wakusangaruka ndimunkhwara wamampha, kweni mzimu wa chitima umizga viwanga.

²³ Munthu wa mphulupulu waronda vinda ndi mtima wose kutimbanizga nthowa za cheruzgu chirunji.

²⁴ Munthu wakuwamo warazga chisku chake pa zeru, kweni maso gha wakupusa ghe pa umari wa charu chapasi.

²⁵ Mwana wakupusa wapaska chitima awiske ndi kuŵaŵa ku nyina yo wangumupapa.

²⁶ Kulipiska munthu murunji kuti nkhwamampha cha; kupuma vikoti ŵanangwa nkhulakwa.

²⁷ Mweniyo wakanizga mazu ghake we ndi chinjeru; ndipo mweniyo wendi mzimu wakuzizira ndi munthu wakuwamo.

²⁸ Chingana ngwakupusa yo wajachisisi waneneka kuti ngwa zeru, penipo wajara milomo yake ŵatiti ngwa chinjeru.