Nthanthi 15 - Tonga Bible 1986

¹ Kwamuka kwakoloŵa kutuzgapo chikwiya, kweni mazu gha ukari ghasosomo ukari.

² Lilime la wazeru lirunguchizga chinjeru, kweni milomo ya ŵakupusa yidira kupusa.

³ Maso gha Ambuya ghemu malo ghose, ghalereska ŵaheni ndiŵamampha.

⁴ Lilime lakuzika ndi muti wa umoyo, kweni kulandizga kwamukati mwake kunanga mzimu.

⁵ Wakupusa wayuyuwa kwambuzga kwa awiske, kweni yo waphwere kuchenya ngwazeru.

⁶ Mu nyumba ya murunji mwe usambasi unandi, kweni suzgu yiwiya chuma cha wamphurupuru.

⁷ Milomo ya wazeru yiwandiska chinjeru, ku miwongo ya wakupusa kuti kwe viyo cha.

⁸ Mpasku wa wamphulupulu mbukazuzi ku Ambuya, kweni rombu la wakunyoroka ndi likondwa lawo.

⁹ Nthowa ya wamphulupulu mbukazuzi ku Ambuya, kweni ŵatanja mweniyo wandondoloska urunji.

¹⁰ Pe kulangika kuzitu kwaku yo wareka nthowa; mweniyo watinkha kuchenyeka wakafwanga.

¹¹ Muunda ndi pharghaniku vye pakweru paurongo pa Ambuya, nako kwe mtima ya ŵanthu kwe uli!

¹² Wakunyoza kuti wakhumba kuchenyeka cha; kuti wakhumba kuya ku wazeru cha.

¹³ Mtima wakukondwa usangaruska chisku, kweni chifukwa cha chitima mu mtima mzimu usweka.

¹⁴ Muwongu waku yo wendi kuwa moupenja zeru, kweni milomo ya wakupusa yiturgha kupusa.

¹⁵ Mazuŵa ghose gha wakuyuzgika ngaheni, kweni mtima wakusangaruska wendi kurgha kunandi kwakurutiriya.

¹⁶ Nkwamampha kuŵa mkavu, ndikopa Ambuya, kwakuruska kuŵa musambasi mu suzgu.

¹⁷ Nkhwamampha kurgha minkhwani ndi ŵanthu wo utanja, kuruska kurgha nyama yamampha ko kwe tinkhu.

¹⁸ Munthu wachikalirizga wayuska ndeu, kweni yo ngwambura kukara ruŵi wazikiska kupindana.

¹⁹ Nthowa ya mukata yiŵinda ndi minga, kweni gurwi wa wakunyoroka ngwachiwande.

²⁰ Mwana wa zeru wakondwereska wiske, kweni munthu wakupusa wayuyuwa nyina.

²¹ Kupusa kukondwereska mweniyo walivi ghanaghano, kweni munthu wakuwamo watenda umampha.

²² Kwambura chipangu vyakurongosoleka vinangika, kweni ndi ŵakuchinyiya ŵanandi vichitika umampha.

²³ Kwamuka kwaruŵi ndi likondwa ku munthu, ndipo mazu mu nyengo yake, kuti nkhunozga cha!

²⁴ Gurwi wa ŵazeru warongozge kuchanya ku umoyo, alinga wapambane ndi muunda wa pasi,

²⁵ Ambuya ŵaparuliya pasi nyumba ya wakujikuzga, kweni ŵasunga maliri gha choko.

²⁶ Marunguruku gha wamphurupuru mbukazuzi ku Ambuya, mazu gha wakutowa ghatuŵakondwereska.

²⁷ Yo ngwa kasu chifukwa cha kwanduwa kwakupusika watole suzgu pa ŵanyumba yake, kweni mweniyo watinkha vinda wakaŵanga wamoyo.

²⁸ Muwongo wa murunji upenja mwenimo wangamukiya, kweni mlomo wa wamphulupulu uwukuwa vinthu viheni.

²⁹ Ambuya ŵe kutali ku wamphulupulu, kweni ŵatuvwa rombu la marunji.

³⁰ Ukweru wa jiso ukondwereska mtima, ndipo uthenga wamampha uziziriska viwanga.

³¹ Mweniyo gutu lake liphwere kuchenyeka kwamampha wakajanga mukati mu ŵazeru.

³² Mweniyo wakana kusambizgika watijiyuyuwa; kweni mweniyo waphwere kuchenyeka wasaniya kuwamo.

³³ Kopa Ambuya nkhusambizga mu zeru, ndipo ulemu kujiyuyuwa kudanjiya paurongo.