Nthanthi 13 - Tonga Bible 1986

¹ Mwana wazeru watuvwa kurunguchizga kwa awiske, kweni wakuyeya kuti wategherezga ku kuchenya cha.

² Ku chipasi cha mlomo wake munthu wamampha waturgha umampha, kweni khumbo la wakunyenga ndaku ndeu.

³ Yo wavikiriya mlomo wake wasungirizga umoyo; yo wajura kwakuyasama milomo yake watuza ku pharghaniku.

⁴ Mzimu wa mukata upemphapempha ndipo kuti uronde kanthu cha, penipo mzimu wa wakutakataka upaskika usambasi.

⁵ Munthu murunji watinkha utese, kweni munthu wa mphulupulu wachita kwasoni ndi kwakulengeska.

⁶ Urunji utumuvikiriya mweniyo nthowa yake njakunyoroka, kweni uheni ugoda wamphulupulu.

⁷ Munthu yumoza watiji yikamo kuti ndi msambasi, kweni walivi kanthu; munthu munyake watijiyikamo kuti ndi mukavu, kweni we ndi usambasi unandi.

⁸ Thumba lakuwombole umoyo wa munthu mburomba wake, kweni munthu wakusauka walivi nthowa yakuwombokwe.

⁹ Ukweru wa murunji ukondwere, kweni nyali ya wamphulupulu yikazimwikanga.

¹⁰ Ndi mutafu wambura kuphwere wachita ndeu, kweni ŵeniwo wazomera kuŵapanga fundu ndi zeru.

¹¹ Uromba wakuwutole pa befu ukamaranga, kweni mweniyo waunjika kamanakamana wawandaniskenge.

¹² Gomezgu lambura kufiskika litamiska mtima, kweni khumbu lakufiskika ndi muti waumoyo.

¹³ Mweniyo wayuyuwa mazu watijitole phasulu lamweneko, kweni mweniyo wavwiya dangu wakarondenga mphoto.

¹⁴ Kusambizga kwa wazeru nchisima cha umoyo, alinga kuti munthu wapambani ndi viŵana vya nyifwa.

¹⁵ Ghanaghano lamampha lisaniya mwaŵi, kweni nthowa ya ŵambura kuvwana ndi phasulo lawo.

¹⁶ Mu vinthu vyose munthu wakutakataka wachita ndi chinjeru, kweni wakupusa wamemeza kupusa kwake.

¹⁷ Muthenga muheni wachichizgiya ŵanthu musuzgu, kweni muthenga wamagomezgeka watuza ndi kuchizga.

¹⁸ Ukavu ndi chilengesku vituza kwaku mweniyo wakana kusambizgika, kweni mweniyo waphwere kuchenyeka watumbikika.

¹⁹ Khumbu lakufiskika ndakunowa ku mzimu, kweni kutuwako ku uheni mbukazuzi ku wakupusa.

²⁰ Mweniyo watenda pamoza ndi ŵanthu ŵazeru, wasanduka kuŵa wa zeru, kweni wakukwatikana ndi wakupusa wakapotekekanga.

²¹ Soka lidikiskana ndi ŵaheni, kweni kusakata kupaska mphoto kuwakurunjika.

²² Munthu wamampha wasiya chihara ku ŵazuku ŵake, kweni uromba wa muheni uwunjikikiya murunji.

²³ Charu chakutipuwa cha musauchi chimezga kurgha kunandi, kweni chikukurwa chifukwa cha cheruzgu chiheni.

²⁴ Mweniyo wareka kuto ndodo watinkha mwana wake, kweni mweniyo watumwanja watanja kumulanga.

²⁵ Murunji wendi vinandi kukhorweskanja yake, kweni rufu la wamphulupulu lisoŵa kurgha.